Amrud Aur Mulla Ji, Urdu Nazam By Lateef Farooqi

kisi qasbe mein ek tha amrud
bison mein wo nek tha amrud
paDhne jata tha wo namaz wahan
aadmi ek nazar na aae jahan
KHauf us ko hamesha rahta tha
aadmi koi mujh ko kha lega
shauq bola ki ek din jao
kisi masjid mein ja namaz paDho
chhoTi si masjid ek qarib hi thi
the wahan DaT ke baiThe mulla ji
chupke chupke KHuda ki le kar aas
chal ke ja baiTha jutiyon ke pas
junhi sajde mein us ne rakha sar
aae mulla ji us taraf uTh kar
aise mulla nadide hote hain
dekh ke khane hosh khote hain
halwa khate hain nan khate hain
jab mile kuchh na jaan khate hain

jhapTe us par pakaD liya amrud
chiKHa chillaya ro paDa amrud
kaha amrud ne ki mulla ji
ho agar aaj meri jaan-baKHshi
phal khilaunga aap ko aisa
achchha mujh se hai zaiqa jis ka
phir kaha ye ki mere sath aaen
jis jagah main kahun Thahar jaen
ek dukan ke qarib aa ke kaha
aaiye dekhiye hai kaisa maza
kela jaldi se ek uTha lije
aur masjid mein chal ke kha lijiye
malik us ka wahan na tha maujud
mulla maujud tha KHuda maujud
kela masjid ke pas le ke chale
chalte chalte wo aaKHir aa pahunche
kaha amrud ne nikaliye aap
chhil kar kela us ko khaiye aap
lage masjid mein jaane jab kha kar
aa gaya un ka panw chhilke par
wae qismat ki aap aise gire
ek ghanTe se pahle uTh na sake
mauqa pate hi chal diya amrud
de ke mulla ko jul gaya amrud
hirs ka KHub hi maza paya
dudh un ko chhaTi ka yaad aaya