Ek Nau-bahaar-e-naz Ko Mehman Karenge Hum, Urdu Ghazal By Majeed Lahori

ek nau-bahaar-e-naz ko mehman karenge hum
har dagh-e-dil ko rashk-e-gulistan karenge hum

saghar mein nur-e-dida-e-anjum unDel kar
phir tirgi-e-gham mein charaghan karenge hum

uD jaengi faza mein bahaaron ki dhajjiyan
jis waqt tar tar gareban karenge hum

kahte hain aasman pe wo zulfen bikher kar
jhulsi hui zamin pe ehsan karenge hum

ji bhar ke hum ko kar le pareshan aasman
ek roz aasman ko pareshan karenge hum

ai waqt san ki aaega jab bhi hamara waqt
tufan ko mauj mauj ko tufan karenge hum

jab tak hamare samne jam-e-sharab hai
barham mizaj-e-gardish-e-dauran karenge hum

wo aarzu ki dil se zaban tak na aa sake
kuchh is ka tazkira bhi meri jaan karenge hum

dur KHizan se koi kahe ja ke a 'majid'
phir ehtimam-e-jashn-e-bahaaran karenge hum