Dil Kisi Mushtaq Ka ThanDa Kiya, Urdu Ghazal By Naseem Dehlvi

dil kisi mushtaq ka ThanDa kiya
KHub kiya aap ne achchha kiya

aaj haya aankh ki kuchh aur hai
chahne wala koi paida kiya

hae re paiman-shikani ke maze
jab main gaya wada-e-farda kiya

kuchh to kisi ne unhen samjha diya
hum jo gae aaj to parda kiya

go ki na tha meri taraf munh magar
tirchhi nigahon se wo dekha kiya

aah ki taqsir nahin hai magar
be-asari ne mujhe ruswa kiya

kah ke le aate hain tumhein hoshiyar
ye na kiya hum ne to phir kya kiya

maut ke sadqe ki ye kahte the wo
aaj na us ne koi phera kiya

aap ke ehsan ki tarif hai
main ne agar shikwa-e-ada kiya

nam mera sunte hi sharma gae
tum ne to KHud aap ko ruswa kiya

qadr meri tum ne na ki warna main
kya kahun kya aap ko samjha kiya

main ne to ai jaan-e-jahan jaan di
tum ne ada haqq-e-wafa kya kiya

phir wo nahae araq-e-sharm mein
kis ne mere ishq ka charcha kiya

main dil-e-sad-chaak ka kahta tha haal
shana abas zulf se uljha kiya

us ki nazar mein hua halka 'nasim'
mujh se mere shauq ne kya kya kiya