Waqt, Urdu Nazam By Naseem Syed

bas aur ghaDi do ghaDi sahi
phir waqt ke pyale se girti
hasti ki rit ko
pyala KHali karna hai
har bazi waqt ki bazi thi
har bazi par shah mat hui
ab daman jhaD ke uTThenge
sari mehnat barbaad hui
KHushnudi-e-waqt ki KHatir hum
bas kya kya bar uThate hain
hum aas ki shabnam bote hain
aur yas ke sahra pate hain
zahir mein to himmat oDhe hain
aur andar TuTte jate hain
ye ilm ki taqat
dil ki sadaqat
qalam ki himmat
apne liye sab na-samjhi ki baaten hain
ye jah-o-hasham bhi un ke hain
jo shadabi ke pale hain
apni to himmat sarf hui
sari mehnat barbaad hui
jo dil ke tahon mein TuT gaya
jo andar andar bit gai
us kahish-e-jaan ka zikr hi kya
ab muTThi ret ki bazi hai
so kaun si aisi bazi hai
ab haar aur jit ki fikr hi kya
sab jaan liya sab dekh liya
jab sab raste be-manzil hain
jab sab lamhe patthar-dil hain
jab sochen sab la-hasil hain
phir kya sochen phir kyon sochen
lo hum KHud apni muTThi se ye ret girae dete hain
ya Thahr ke samjhe waqt hamein
ya hum Thahrae dete hain