Kabhi Tujh Ko Yahan E Andesha Jaan Tha Pehle, Urdu Ghazal By Nasreen Syed

کبھی تجھ کو یہاں اندیشہِ جاں تھا پہلے؟

یہ مرا دل تو ، تری جائے اماں تھا پہلے

ایسا لگتا ہے ، چڑھا اِس پہ ترے عشق کا رنگ

دل کو جس رنگ میں دیکھا ہے، کہاں تھا پہلے

عشقِ سوزاں کی ہوئی خاص عنائت مجھ پر

ہے جہاں راکھ ، مرا حُجرہ وہاں تھا پہلے

کائیناتیں جہاں اب وجد میں آئی ہوئی ہیں

ایک مجذوب ، یہاں رقص کناں تھا پہلے

جس کو رقّت نے بنا ڈالا ہے بہتا جھرنا

آتشِ عشق سے، دل شعلہ بجاں تھا پہلے

ترے ہونے سے مری ذات کی تصدیق ہوئی

مرا ہونا تو۔۔۔۔۔۔۔۔۔۔ فقط وہم و گماں تھا پہلے

تیرے اک لطف سے وہ درد کی لذت بھی گئی

کتنا سر سبز ۔۔۔۔۔۔۔۔۔۔۔۔۔۔ مرا زخمِ نہاں تھا پہلے

اب تو اس نام کو لیتے ہوئے، لب جلتے ہیں

ہائے جو نام ۔۔۔۔۔۔۔۔۔۔ سدا وردِ زباں تھا پہلے

ہے جہاں تیرہ شبی ٹھہری ، ترے ہونے سے

کتنا پُر نُور ۔۔۔۔۔۔۔۔۔۔۔۔۔۔ مرا قریہِ جاں تھا پہلے

یہ جو لکنت ہے زباں میں، ہے ترا رعبِ جمال

یہ مرا عجزِ بیاں ۔۔۔۔۔۔۔۔۔۔۔۔۔ زورِ بیاں تھا پہلے

اب تو اس شخص کی یاد آتی نہیں ہے نسرینؔ

وہ جو رگ رگ میں لہو بن کے رواں تھا پہلے