Yeh Jaltarang Baja Ya Rubab Paani Per, Urdu Ghazal By Nasreen Syed

یہ جلترنگ بجا ۔۔۔۔۔۔۔۔۔۔۔ یا رُباب ، پانی پر

کہ رقص کرنے لگا ۔۔۔۔۔۔۔۔ ماہتاب پانی پر

غضب کیا ۔۔۔۔۔ اسے غمزہ سکھا دیا، گویا

لگا دی آگ ۔۔۔۔۔۔۔۔۔۔۔۔۔ گرا کر شراب پانی پر

نہ ڈوبنے سے ڈراؤ ہمیں کہ عشق میں ہم

تمام عمر ۔۔۔۔۔۔۔۔۔ چلے ہیں جناب ، پانی پر

لگا ہے بہنے وہ اب کے بلندیوں کی طرف

کہ کُھل گیا ہے ۔۔۔۔۔۔۔۔ نیا کوئی باب پانی پر

حسین جھیل میں ۔۔۔۔۔۔لیتا ہے چاند ہلکورے

کوئی فسوں ہے کہ اترے ہیں خواب پانی پر

وہ تشنگی تھی ۔۔۔۔۔۔۔۔۔۔ سمندر بجھا نہیں پایا

پکارتی رہی میں ۔۔۔۔۔۔۔۔۔۔۔۔ آب آب ، پانی پر

گمان آب کا ۔۔۔۔۔۔ رکھا ہے ریگِ صحرا پر

کہ رکھ دیا ہے کسی نے ، سراب پانی پر

سمجھ سکو تو ہے اوقات زندگی کی یہی

ذرا سی دیر کا مہماں، حباب ۔۔۔۔۔۔ پانی پر

یہ لہر لہر ۔۔۔۔۔۔ میری رازدان ہے نسرینؔ

کتابِ جان کا لکھا ۔۔۔۔۔۔۔۔۔۔ انتساب پانی پر