Ainak Ki Qabr, Urdu Nazam By Nastaran Ahsan Fatihi

apni binai khoti aankhon se
kamre mein bikhri parchhain ko
dekh kar main ne kaha
main tanha nahin hun
apni ham-joli ainak ke sath
sair karti hun
dur-daraaz ilaqon tak
ghum aati hun
tariKH ke tah-KHanon mein
aur
falsafi ke zehnon
ke raaz
jaan leti hun
kabhi sharma kar simaT jati hain
yaadon ki parchhaiyan
tab main DhunDti hun
ham-joli ainak ko
jo satati hai bar-bar
oT mein ho kar
milti nahin
DhunDe se bhi
main ghabra jati hun
apne adhure-pan se
wo phir muskura kar jhankti hai
takiye ki oT se
magar aaj ye hadisa hua
jab kho diya use
to wo mil na saki
main bhaTakti rahi
dhundli aankhon se
sare ghar mein
bartanon ki almariyon
aur kapDon ki daraazon mein
dhup chhanw aur bistaraon mein
kahin bhi nahin thi wo
be-chaari si thak kar baiTh gai main
huruf ke liye tarasti hui
meri nazren majbur-e-mahz
us ke baghair
dekh na pain
meri ainak ki qabr
aur wo kitabon ki dabiz tahon mein dafn
hoti gai