Ammi, Urdu Nazam By Nusrat Zehra

امّی چلو، گھر چلیں۔۔۔۔

بڑھ گیا ہے اندھیرا۔۔۔۔

یہ کیسی اُداسی رچی ہے فضاء میں؟

ہوئی شام، مغرب ہے، خاموشیاں ہیں۔۔۔۔

پرندے بھی اب اپنے گھر کو چلے ہیں۔۔۔۔

تمہیں تو نہ رغبت تھی ایسی فضاء سے۔۔۔۔

جہاں صرف خاموشیاں ہم زباں ہوں۔۔۔۔

کوئی بھی نہ بولے، نہ کوئی بلائے۔۔۔۔

اندھیرے کی چُپ تم کو بھاتی کہاں تھی؟

کبھی جب اِدھر سے اُدھر کو میں جاتی۔۔۔۔

تو تم کو یہ بات اک نظر بھی نہ بھاتی۔۔۔۔

ہر ایک گام پر مجھ کو تم نے پکارا۔۔۔۔

ہر اک موڑ پر تم نے مجھ کو صدا دی۔۔۔۔

یہ کیسی ہے چُپ؟ ٹوٹتی ہی نہیں ہے۔۔۔۔

کہ حد ہو گئی تم کو میری بھی پرواہ نہیں ہے۔۔۔۔

تمہارا مصلّہ ابھی بھی بچھا ہے۔۔۔۔

وہ خاکِ شفا جس پہ سجدہ کیا تھا۔۔۔۔

تمہارے ہر اک لمس سے آشنا ہے۔۔۔۔

کہاں کھو گئی ہو؟ کہاں سو گئی ہو؟

چلو گھر چلیں۔۔۔۔

بڑھ گیا ہے اندھیرا!!!