Parveen Ke Aaine Ka Aakhri Subah Parveen Se Mukalma, Urdu Nazam By Nusrat Zehra

کہاں جا رہی ہو؟

نیا پیرہن سبز رنگا بہت جچ رہا ہے یہ تم پر۔۔۔۔

تمہاری یہ کنگھی بہت ہے پریشاں۔۔۔۔

کہ گیسو سنوارے یا روکے تمہیں اس سفر سے۔۔۔۔

جس میں رنگی جائے گی مانگ خوں سے تمہاری۔۔۔۔

صدقہ دیا کیا؟۔۔۔۔

نظر ہے اتاری؟۔۔۔۔

بڑی عجلتوں میں یہ الماری تم نے صبح اٹھتے ہی کھول لی تھی۔۔۔۔

اسے بند کردو۔۔۔۔

مت کرو اتنی عجلت۔۔۔۔

ذرا دم لو، اور پھر باغ جاؤ۔۔۔۔

نئے پھول خوش رنگ کچھ کہہ رہے ہیں یہ تم سے تمہاری کتابوں کا ہر لفظ بھی بول اٹھے گا۔۔۔۔

تو آج اپنی تنہائیوں کے رفیق۔۔۔۔

اپنی کتابوں کے کمرے میں آؤ۔۔۔۔

ذرا کشف معجوب کھولو۔۔۔۔

بس کسی بھی طرح آج کا دن گزارو۔۔۔۔

بہت دھند ہے،ٹھنڈ ہے ،شدتیں ہیں ہوا میں۔۔۔۔

ہلکی بارش بھی بس گنگنانے لگی ہے کچھ ایسا کرو آج باہر نہ جاؤ۔۔۔۔

اور اپنے ہر اک دن کی طرح یہ دن بھی پیارے گیتو کے نام لکھ دو۔۔۔۔

اسے اپنے ہاتھوں سے کھانا کھلاؤ۔۔۔۔

اور اپنی سکھی کو بھی بس فون پر اطلاع دو۔۔۔۔

کہ دن آج کا یہ بڑا ہی نحس ہے۔۔۔۔

میں آ نہ سکوں گی۔۔۔۔

یہ کافی کی اور خشک میوے کی محفل۔۔۔۔

کبھی فرصتوں میں رکھیں گے۔۔۔۔

نہ جانے وہ وحشت تھی، عجلت تھی، کیا تھی۔۔۔۔

کہ پارہ نے اک نہ سنی آئینے کی۔۔۔۔

بڑی عجلتوں میں چلی سوئے برزخ۔۔۔۔

عدم کے سفر پر اکیلی ہی چل دی۔۔۔۔