Mere Chehre Pe Tere Rang, Urdu Nazam By Nusrat Zehra

میرے چہرے پہ تیرے رنگ۔۔۔۔

یہ آنکھیں سرمگیں تیری۔۔۔۔

مثال ابر کرم۔۔۔۔

لب خوش رنگ جیسے۔۔۔۔

وجد میں جام ثبات دیر و حرم۔۔۔۔

قبائے سیاہ بھی تیری۔۔۔۔

بہت تاریک راتوں میں۔۔۔۔

میرے احساس کے تن من پہ ابرق سی بچھاتی ہیں۔۔۔۔

تیرے یہ رنگ مجھ میں۔۔۔۔

اس طرح تحلیل ہوتے ہیں۔۔۔۔

کہ میری روح پہچانی نہیں جاتی۔۔۔۔

میرے قدموں کے نیچے۔۔۔۔

قرمزی رنگوں کے اتنے پھول کھلتے ہیں۔۔۔۔

کہ جیسے حیرتوں کی وادیوں میں۔۔۔۔

روح افزا آبشاریں پانیوں کے بازوؤں میں رقص کرتی ہیں۔۔۔۔

تری جبیں تلک لے جانے والے سارے رستوں میں۔۔۔۔

پورے چاند اور پھر جگنوؤں کی روشنی کتنی اضافی ہے۔۔۔۔

صدائیں تیری سماعت کو میری جب بلاتی ہیں۔۔۔۔

فضا میں نقرئی پازیب ایسے گونج اٹھتی ہے۔۔۔۔

کہ جیسے گوریاں ماں کے مگر کو چھوڑ کر۔۔۔۔

پیا کے سنگ سرخ آنگن میں اترتی ہیں۔۔۔۔

میرے آنچل میں تیرے پیار کی کلیاں چٹکتی ہیں۔۔۔۔

شرارت سے بھرا لہجہ ترا جب گنگناتا ہے۔۔۔۔

حجابوں سے مری ہستی کے ساتوں سر دھڑکتے ہیں۔۔۔۔

کوئی بے حد شناسا گیت پوروں تک اترتا ہے۔۔۔۔

حنائی رنگ ہاتھوں میں نکھرتے ہیں۔۔۔۔

مرے چہرے پہ سارے رنگ تیرے کھلنے لگتے ہیں۔۔۔۔