Wa Hussaina, Urdu Nazam By Nusrat Zehra

مرے جینے کو خدائے لم یزل نے۔۔۔۔

اس کے چہرے پر لکھی ہے اک کہانی۔۔۔۔

کہانی وہ جو اس کی آنکھ کی پُتلی میں۔۔۔۔

ایسے رقص کرتی ہے۔۔۔۔

اٹی ہے دھول سے تصویر میری۔۔۔۔

مگر اب بھی وہ اتنی صاف اور واضح دکھائی دے رہی ہے۔۔۔۔

کہ جیسے آئینے میں چاند اتر آئے۔۔۔۔

کبھی جب پیاس حد سے بڑھ رہی ہو۔۔۔۔

اکھڑتا ڈولتا دم۔۔۔۔

آن واحد میں رگوں میں پھر سے بہتا ہے،

سکوں پاتا ہے۔۔۔۔

یہ جادوئی مشیں موبائل میرا اور۔۔۔۔

اس کی گیلری میں (Saved)

اس کے عکس ہائے منجمد۔۔۔۔

مجھ میں ایسے تیرتے ہیں۔۔۔۔

میں برق و رعد سی نظروں میں۔۔۔۔

تیکھے وار اس کے۔۔۔۔

دل میں مقید کر کے ہنستی ہوں۔۔۔۔

یہ (Aura) رات بھر۔۔۔۔

مجھ پر ایسے سینہ تان کے رکھتا ہے۔۔۔۔

جیسے وہ پہرے دار ہے سایہ فگن مجھ پر۔۔۔۔

میرے احساس پر، جذبات پر، الفاظ پر ایسے۔۔۔۔

مئی کی گرم شاموں میں۔۔۔۔

آم کھاتے وقت۔۔۔۔

ٹھنڈی شاموں کی لطافت۔۔۔۔

گھر کے آنگن میں کھیلتے بچے۔۔۔۔

بزرگوں کی نصیحت آمیز باتیں۔۔۔۔

جوانوں کے تھرکتے قہقہے۔۔۔۔

جھومتی شاخیں وہ پیڑوں کی۔۔۔۔

اپنے ہونے کا جو اک احساس دیتی ہیں۔۔۔۔

مگر جب سوچتی ہوں میں تجھے۔۔۔۔

اے مرے مظلوم امام۔۔۔۔

کہ تم نے مشکلوں میں، غربتوں میں۔۔۔۔

کس طرح تنہا، دکھوں اور درد کی،

اس ابتلاء کو ہنس کے جھیلا۔۔۔۔

نہ تھے آنگن تمہاری پاک عترت کے لیے۔۔۔۔

جو انہیں جھولا جھلاتے۔۔۔۔

مئی کی گرم شامیں۔۔۔۔

آم، ٹھنڈا پانی، محفلیں اور نرم آبی قبائیں۔۔۔۔

لپکتی شاخیں وہ پیڑوں کی۔۔۔۔

تمہارے دھوپ سے جھلسے ہوئے رخساروں کے لیے،

ٹھنڈی ہوا، جو انہیں آرام دے۔۔۔۔

گھنے سائے تلے، سستانے کو کچھ وقت مل جائے۔۔۔۔

تن تنہا وہ تم تھے۔۔۔۔

جس کے پاس۔۔۔۔

72 لال تھے ماؤں کے۔۔۔۔

اور ان کی وفا سایہ فگن قرآن کی مانند۔۔۔۔

دل پر لکھی تحریر ہو جیسے۔۔۔۔

میں دکھ سے سوچتی ہوں!

سرور کونین کے دوش مبارک پر۔۔۔۔

سواری کرنے والا شاہزادہ!

وہ جنت کے جوانوں کے لیے پیام بہار!

ریگ صحرا میں۔۔۔۔

بلا و ابتلاء کی کربلا میں۔۔۔۔

پیاس کی شدت میں۔۔۔۔

اپنے دیس اور پھر اپنے نانا کے یثرب سے پرے۔۔۔۔

دکھوں اور درد کی اس ابتلاء میں۔۔۔۔

وہ تم تھے۔۔۔۔

جو بے بس تھے، بے کس و تنہا تھے!

کبھی مظلومیت کو چہرہ مل جائے۔۔۔۔

تو بالکل یاحسین! تیرا مکمل عکس بن جائے!

مگر تیرے لیے قربان ہو جائیں۔۔۔۔

تمہارے چاہنے والے۔۔۔۔

کہ تم نے اپنے بچے، اپنا گھر، پیرو جواں۔۔۔۔

بھتیجے، بھانجے، دلارے، یار پیارے۔۔۔۔

اور پھر جد کے وہ انصار سارے۔۔۔۔

نہ چھوڑا کچھ بھی تو راہ خدا میں۔۔۔۔

واحسینا!

میں دکھ سے سوچتی ہوں۔۔۔۔

درندوں کے جہاں میں۔۔۔۔

کربلا کے ریگستان میں۔۔۔۔

جسے ہر گز نہ تھے درکار۔۔۔۔

کسی کے عکس ہائے منجمد۔۔۔۔

کسی کی مدھ بھری آنکھیں!

کسی کے عہد تازہ و قدیم۔۔۔۔

اور ان سے جڑی شامیں۔۔۔۔

جلانے اور جینے والے وہ ارمان سارے۔۔۔۔

نہ شہزادی عجم کی شہربانو۔۔۔۔

کہ جس کے عشق نے۔۔۔۔

شبیر کو مکمل جاودانی دی!

خدائے لم یزل!

اسے درکار تھی تیری رضا، تیری گواہی۔۔۔۔

میں دکھ سے سوچتی ہوں!

دل میں بس اک بات۔۔۔۔

رہ رہ کر مجھے مظلومیت کے سورما کے۔۔۔۔

تجھ سے ملنے کی ادا پر۔۔۔۔

جان و تن سے۔۔۔۔

ایک نئے پیغام کی مانند۔۔۔۔

زندگی کرنے کا ایسا درس دیتی ہے!

میرے دل سے اک ایسی ہوک اٹھتی ہے۔۔۔۔

اگر میں تیرے در کی خاک کو سرمہ بنا لوں۔۔۔۔

اور ماتھا ٹیک کر۔۔۔۔

کہوں تجھ سے۔۔۔۔

میں تیری اس صدا پر آج بھی لبیک کہتی ہوں!

کہ چودہ سو برس پہلے کبھی تو نے۔۔۔۔

جو اپنے چاہنے والے کو اک آواز دی تھی!

میں حاضر ہوں۔۔۔۔

میری ہر اک حقیقت، ہر فسانہ، ہر ترانہ۔۔۔۔

بس اب انجام چاہیں گے۔۔۔۔

ترے ہی سائے میں آرام پائیں گے۔۔۔۔

وا حسینا، وا حسینا، وا حسینا۔۔۔۔