Falak Pe Le Ga Na Mujh Ko Zameen Pe Chhore Ga, Urdu Ghazal By Professor Rasheed Hasrat

فلک پہ لے گا نہ مُجھ کو زمِیں پہ چھوڑے گا

عدم سے لایا گیا تھا وہِیں پہ چھوڑے گا

عِبادتوں کا مِری کُچھ نہ کُچھ صِلہ تو مِلے

بس اِک نشان سا میری جبِیں پہ چھوڑے گا

لہو پلا کے جو بیٹا جوان میں نے کیا

وہ گھر سے لا کے مُجھے اور کہِیں پہ چھوڑے گا

جو مشکلیں ہیں وہ آسان ہوتی جائیں گی

خُدا یہ بات تُمہارے یقِیں پہ چھوڑے گا

گُمان ہے یہ تُمہارا کہ دوست مُخلص ہے

پڑا جو وقت کہِیں پر، وہِیں پہ چھوڑے گا

شِکستہ حال مُجھے اُس نگر کو جانا پڑا

سِتارے یہ نِگہِ آبگِیں پہ چھوڑے گا

میں جانتا ہُوں اُسے بے ضمِیر اِتنا ہے

گُھما کے بات وہ پردہ نشِیں پہ چھوڑے گا

اُسے بھی مَلنا پڑے گا کبھی کفِ افسوس

مُعاملات جو شامِ حسِیں پہ چھوڑے گا

کِسی نے تِیرگی کی مُجھ سے فصل کٹوائی

مِلا جو نُور مُجھے بھی وہِیں پہ چھوڑے گا

فساد کیسا یہ مِیراث کے لِئے بھائی

یہاں کی چِیز ہے سب کُچھ یہِیں پہ چھوڑے گا

مکِیں مکاں کو جو حسرتؔ بدلتے رہتے ہیں

مکان دُکھ یہ سبھی اب مکِیں پہ چھوڑے گا