Ho Ke NaKam Bhi Aata Hai Magar Jata Hai, Urdu Ghazal By Professor Rasheed Hasrat

ہو کے ناکام بھی آتا ہے مگر جاتا ہے

دِل اڑے ضِد پہ تو یادوں کے نگر جاتا ہے

یاد آتا ہے کوئی عُمر گُزرنے کے ساتھ

اور لمحوں میں کوئی دِل سے اُتر جاتا ہے

کِتنا مشّاق نقب زن ہُوں چُراؤں اسباب

اور اِلزام کِسی اور کے سر جاتا ہے

پہرہ دینا تھا اُسے کیسے بھلا سو لیتا

صُبح ہوتے ہی وہ بازار سے گھر جاتا ہے

جھگڑا ماں باپ کا معمُول اگر ہو جائے

اِس کا بچّوں کے بھی ذہنوں پہ اثر جاتا ہے

بات کُچھ اور نہ تھی اُس کو بِچھڑ جانا تھا

دیکھ محبُوب کی آنکھوں سے گُہر جاتا ہے

وہ جِسے رُتبہ شہادت کا ہُؤا ہے معلُوم

سر بکف جاتا ہے، وہ سینہ سپر جاتا ہے

اِتنا آساں بھی نہِیں راہِ وفا پر چلنا

روگ لگتا ہے کبھی ہاتھ سے سر جاتا ہے

کِسی بچے کو بِلکتا ہُؤا دیکھا جو کبھی

رونا آتا ہے یہ دِل درد سے بھر جاتا ہے

وہ جِسے لوگ سمجھتے تھے کہ نا اہل ہے یہ

معرکے عِشق کے کرتا ہُؤا سر جاتا ہے

جِس نگر جا کے رہُوں ساتھ مِرے اے حسرتؔ

چاک پر کُوزہ بنانے کا ہُنر جاتا ہے