Jangal Sun Raha Hai, Urdu Nazam By Sheba Taraz

مجھے لگتا ہے… جنگل سُن رہا ہے

مسافر کی ہر اک آہٹ پہ

سرکو دُھن رہا ہے،

خموشی کی سپرلے کر

اندھیرا ڈھال کرکے،

مری آنکھوں سے موتی چُن رہا ہے

مجھے لگتا ہے، جنگل سُن رہا ہے،

شام، دھندلی شام

شانوں پر لپٹے،

بسیرے طائروں کے

گرم راتوں میں چھپائے

سنہری دن کے سپنے بُن رہا ہے

مجھے لگتا ہے، جنگل سُن رہا ہے

سمندر جانتا ہے

انسانوں کے سارے دُکھ

سمندر … جانتا ہے

یہ دریا، آبشاریں اور پربت

کسی کے منتظر ہیں…

وہ سائے آہٹوں کے

جوانہیں تسخیر کرڈالیں

طلسمی خاموشی کو

زیر کر ڈالیں…

یہ جھیلیں بولتی ہیں…

جب انہیں سننے کوئی آئے

یہ سارے راز حُسن و دلکشی کے

کھولتی ہیں…

ہوائیں جاگتی ہیں…

جب سمے خاموش ہوتا ہے

… محبت کے جنوں کا آخری لمحہ

جسے جینے کی خواہش ہو

سنہری خواب کی آغوش میں

مدہوش ہوتا ہے…

بہت کڑوا مزہ ہے زندگی کا

جو لمحہ خواب کا ہے

روشنی سے چور ہوتا ہے…

ستارے پوچھتے ہیں

آنکھ کے بوجھل کناروں سے

محبت کا ہر اک منظر

کہاں پر چھپ گیا ہے…

… محبت… سوچکی

مگر کب کی…

محبت سوچکی ہے!

جھوٹ بڑھتا جارہا ہے

مصلحت اندیش سچ بھی

سرجھکائے سوچتا ہے،

زندگی کا ذائقہ کڑوا ہے؟

…یا…پھر…میں…؟؟