Bebas Badawe, Urdu Nazam By Sheba Taraz

پرندے جانتے ہیں

کھیت میں انساں نہیں کوئی

بڈاوے ہیں …

ہوا چلتی ہے تو

بھوسے کے بازو سرسراتے ہیں

بدن پہ رنگ برنگے چیتھڑے لٹکے ہوئے ہیں

اور منہ کی گیند بھی بھوسہ بھری ہے

اور سِلے ہونٹوں کے اوپر

گول آنکھیں… بس ڈراوا ہیں …

پرندے جانتے ہیں…

دانہ دانہ چنتے جاتے ہیں

مسکراتے ہیں…

اِدھر… اِن کائناتی وسعتوں میں اک ستارہ

اِس ستارے پر بقا کا استعارہ

انسان… بیچارہ…

بڈاوا ہے…

بدن پر رنگ برنگے چیتھڑے لپٹے ہوئے ہیں

گول چہروں پر

سِلے ہونٹوں کے اوپر

غم بھری بادام سی آنکھیں

بے ہاتھ بازو…

بس دکھاوا ہیں…

کسی لکھی ہوئی تقدیر کے نرغے میں

اپنا سرجھکائے ڈولتا ہے…

دانہ دانہ چنتا جاتا ہے

مسکراتا ہے…

غموں میں زندگی کو گھولتا ہے

… بولنا چاہے بھی

تو کب… بولتا ہے…!!