Mubarakbaad Phulon Ke Liye Aur Khaar Par Lanat, Urdu Ghazal By Ujjawal Vashishtha

mubarakbaad phulon ke liye aur KHar par lanat
are mali usulon par tere kirdar par lanat

jo hasil hai wahi kafi hai bas mere guzare ko
karun main shukriya is par ka us par par lanat

wo jis ki did se aankhon ki binai chali jae
to us husn-e-sarapa ke hai phir didar par lanat

hamare zahr ne dekho yahan manzar badal Dale
sapere ne kaha ajgar teri phunkar par lanat

hifazat kar nahin sakta hai jo apne qabile ki
koi kaise nahin bhejega us sardar par lanat

kisi mazlum ki KHatir agar ye uTh nahin sakti
to hai phir zang-alud aap ki talwar par lanat

na tu hi hai mere ghar mein na hai taswir hi teri
bhala kaise na bhejun phir dar-o-diwar par lanat

samajhdari se apni race jiti ek kachhue ne
are KHargosh teri chaal par raftar par lanat

agarche sal ke bawan dinon us se bichhaDna hai
to phir har ek mahine ke har ek itwar par lanat

agar logon mein nafrat banTana hai shaeri teri
to ai 'ujjwal' teri mahfil tere ashaar par lanat