Sindh By A H Khanzada

میں شاہ لطیف کی سندھڑی ہوں اور راہِ طلب کا راہی ہوں

میں پاکستان کا بانی ہوں اور آزادی کا سپاہی ہوں

میں سرور ہوں میں سچل ہوں میں تاجل،بیدل،حمل ہوں

میں اُس کی آنکھ کا کاجل ہوں، اُن آنکھوں کی گہرائی ہوں

ہے کون جو یہ فریاد کرے، رب عالم سب آباد کرے

میں باغ میں گل ہوں بلبل ہوں میں خوشبو ہوں پُروائی ہوں

دھرتی کی محبت میں اکثر میں جاں سے گذرتا رہتا ہوں

میں سورہیہ بادشاہ، ہوش محمد، دودو باگل بائی ہوں

تہذیب و ثقافت کی بازی گر جیت سکو تو جیت لو تم

میں بوبک ہوں، بھنبھور بھی ہوں میں یک تارا شہنائی ہوں

مشہور کہاوت ہے میری پہچان محبت ہے میری

میں رلی ، گربی،موٹھڑا ہوں میں تھادل ہوں سردائی ہوں

بستی تھی کبھی مویئن جو دڑو، اس بات پہ بے شک فخر کرو

میں اجرک سندھی ٹوپی ہوں، میں محفل ہوں تنہائی ہوں

میری تو وفا ہے مجبوری، سانول ہو کہ پُنھل ہو صاحب

میں سسی ماروی اُن کی ادا، کہنا بھی نہیں ہرجائی ہوں

جو مجھ سے محبت کرتے ہیں اُن کے لئے سارے رستے ہیں

میں دیبل، کارونجھر، کینجھر میں کینجھر کی گہرائی ہوں

بھاگی نے جو بھاگ جگائے ہیں الن نے الاپ لگائے ہیں

میں ڈھول فقیرمیںیوسف جُمن ،کافی ہوں سُر وائی ہوں

یہ ملک ملیر ہمیشہ ہمدم سارا پاکستان رہے

میں صوفی مست قلندر ہوں میں اک بندہ مولائی ہوں