Afsana By Ghazala M. Ali

اُس رات بھی میں لان میں اپنی گہری سوچوں کو لئے اور گرم موسم کی شدت کو نظرانداز کئے کرسی پہ بیٹھی تھی۔ میرے سامنے ایک خالی بینچ تھا اور سوچوں میں گم اسی کو دیکھے جا رہی تھی جیسے مجھے کسی کا انتظار تھا اور اس نے اُس بینچ پر میری قریب بیٹھنا تھا۔ میری پچھلی طرف چند قدم کے فاصلے پر ایک لڑکی فون پر کسی سے بات کررہی تھی اور اس کے الفاظ میری سوچوں کو بے ترتیب کررہے تھے۔ میں اور میرا اکیلا پن اسی کشمکش میں قید تھے کہ مجھے جانی پہچانی سی آہٹ سنائی دی۔ تڑپ کر جو اس طرف دیکھا تو کچھ لڑکیا ں تھیں جن کے قہقوں نے مجھے بے چین کر دیا تھا۔ پھر آخر کافی دیر تک انتظار کرتے ہوئے لبوں سے سرگوشی کی "ڈحونڈ رہی ہیں تجھے میر ی نگاہیں"۔۔۔

اب ہوا بھی چلنے لگی تھی لیکن مجھے جلن ہو رہی تھی کہ وہ کہاں ہوگا۔۔۔ کس کے ساتھ ہوگا۔۔۔ شاید اچھا وقت گزر رہا ہوگا اس کا۔۔۔ لگتی کیا ہوں اس کی کی اسے میری پرواہ ہو۔۔۔ میرا دل رکھنے کے لئے اسے سہنا پرتا ہے وہ وقت جو اسے میرے پاس لے آتا ہے۔۔۔

مگر اس بار مجھے مناسب وقت نہیں ملا کچھ اور سوچنے کے لئے کہ سناٹا کئی آوازوں اور قہقوں کی نظر ہو گیا تھا۔ پھر مجھے وہ آواز بھی سنائی دینے لگی جس کا انتظار تھا۔ نظروں نے بے چین ہو کر ادھر اُدھر دیکھا تو آنکھوں نے اُسے پا ہی لیا۔ اب لب جھوٹی مسکراہٹ دکھا رہے تھے اور دل حقیقت میں بیٹھا جا رہا تھا۔ شدت سے مجھے اس کی طلب ہو رہی تھی لیکن سب کا سب بگڑ گیا جب نظروں نے اسے کسی اور کے ساتھ پایا اور بہت خوش پایا۔۔۔

(ہاسٹل ۹ ، جامعہ پنجاب لاہور کی یادیں)