Soofi Ghazal By Ghulam Ghaush Fateh Chishti

*بفیضان مرشد پاک*

صوفیانہ غزل

نظر بھر کر تمہیں جو دیکھ لے دیوانہ ہوجاۓ

کوئی مستانہ ہو جاۓ کوئی پروانہ ہوجاۓ

جو ادنی سا گداۓ کوچۂ جانانہ ہوجاۓ

خمیدہ اس کے آگے سطوت شاہانہ ہو جائے

سر راہ وفا پلکیں بچھاۓ کب سے بیٹھے ہیں

مشرف قدموں سے اشکوں کا بالا خانہ ہوجاۓ

تمہی تو حسن اول ہو تمہی حسن مکمل ہو

تم آؤ حشر میں تو حشر کیوں برپا نہ ہوجائے

اٹھادو اک نظر تو دشت بھی لالہ بداماں ہو

جدھر سے پھیر لو نظریں ادھر ویرانہ ہوجاۓ

نگاہوں سےپلادیں وہ جسے اک بار تو واللہ

جہاں کیا ہے وہ اپنے آپ سے بیگانہ ہوجاۓ

مئے چشم محبت میں تمہاری ایسی جودت ہے

جو پی لے گھونٹ بھر خود صاحب میخانہ ہوجاۓ

خیال یار آ ،بس جا حصار قریۂ جاں میں

تری خوشبوؤں سے آباد یہ غم خانہ ہوجاۓ

سجا رکھی ہیں گلیاں آنکھوں کی، اشکوں کے پھولوں سے

حریم دل میں شاید ان کا آنا جانا ہو جاۓ

سنا ہے آپ کا دیدار ہوگا جان جانے سے

اگر ایسا ہے تو پھر آئیے بیعانہ ہوجاۓ

نقاب اٹھے ، جمال یار کی کرنیں مجلا ہوں

ادا پھر سجدۂ عشاق بے تابانہ ہوجاۓ

جہاں منصور و سرمد جیسے پروانے مچلتے ہیں

چلو پھر منعقد وہ محفل رندانہ ہوجاۓ

یقینا ہو ہی جاۓ اختتام گرمئ آلام

عطا خوان کرم سے جو کبھی ظہرانہ ہو جاۓ

یہ بزم لا الہ ہے ، محفل لیلی نہیں یارو

جو سرزد ہم سے حرکت کوئی مجنونانہ ہوجاۓ

دوئی کے پردے کرکے چاک مل جاؤں حقیقت سے

میں عاشق ہوں ادا میری بھی معشوقانہ ہوجاۓ

فقط تھا اک دل بسمل اسی کو ساتھ لایا ہوں

قبول بارگہ چھوٹا سے یہ نذرانہ ہوجاۓ

شب مقبولیت ہو،سرمرا ہو،در تمہارا ہو

کھلے چشم طلب توطرز دل گیرانہ ہوجاۓ

وبال جاں نہ بن جاۓ کہیں تشنہ لبی اس کی

خدارا تشنہ لب پر وا، در میخانہ ہوجاۓ

صداۓالعطش دیتا ہوا آجاۓگا واعظ

*اگر کعبےکا رخ بھی جانب میخانہ ہوجاۓ*

تجلی، حسن جاناں کاش فرماۓ کبھی *فاتح*

منور پھر تو قلب و روح کا تہہ خانہ ہوجاۓ

*فاتح چشتی مظفرپوری*

28/4/20