Barhapur By Irshad Aatif

مرا بچپن جہاں گزرا ہیں وہ ندیاں بڑھاپور میں

گزاری ہیں مرے اجداد نے صدیاں بڑھاپور میں

ترقی خوب دیکھوں میں ہیں یہ ارماں بڑھاپور میں

ہر اک انسان ہو یارو یہاں کوشاں بڑھاپور میں

کھلے ہیں پھول ہر جانب مسرت اور ترقی کے

کھلی گھر گھر تمناؤں کی ہر کلیاں بڑھاپور میں

مہینوں رہ کے بھی احساس پردیشی کو ہوتا ہے

کہ جیسے گزری ہیں دو چار ہی گھڑیاں بڑھاپور میں

ہر اک تہوار مل جل کر مناتے ہیں یہاں پر سب

دوبالا ہوتی ہیں اس سے یہی خوشیاں بڑھاپور میں

نہیں بدلا یہاں کچھ بھی وہی میرا بڑھاپور ہے

وہی چوراہوں کی رونق وہی گلیاں بڑھاپور میں

پہاڑا اور نکٹا دونوں بہتی ہیں جدا ہو کر

گلے ملتی ہیں آ کر کے یہی ندیاں بڑھاپور میں

کبھی امرود توڑے ہیں کسی بغیا سے بچپن میں

چرائیں ہیں کئی باغوں سے بھی امبیاں بڑھاپور میں

بڑھاپور والوں سے میری یہی ہے التجا ہر دم

نہ ہو کوئی کبھی بھی اب یہاں عریاں بڑھاپور میں

جوانوں تم بڑھاپور کو بنا دو ایسا مل کر کے

نظر آئے کسی کو بھی نہ پھر کمیاں بڑھاپور میں

یہیں سلطانہ ڈاکو بھی ہوا تاریخ کہتی ہے

غریبوں کو وہ دیتا ہر گھڑی خوشیاں بڑھاپور میں

ہیں جتنے بھی محلے سب میں میری جان بستی ہے

دلِ عاطفؔ لگا رہتا ہے جانِ جاں بڑھاپور میں