Sun Ni Meri Pyari Sakhi Tenu Maan Sunawan By Mahpara

سُنڑ نی میری پیاری سَکھی، تینوں مانڑ سُنڑاواں،

بَہہ جا میرے کول میں تَینوں،پَگ دی شان سُنڑاواں

اُڈدی پِھردی وَل کھاندی اےجِس دے سِر تے آوے،

اُس بَندے نُوں پِیر بَنڑاوےاوہدے مانڑ وَدھاوے

سُنڑ نی میری جَھلّی سَکّھی،سُنڑ لے کَملی سیانڑِیں

پَگ دا مالک باد شاہ تے پَگ ہے اُس دی رانڑیں

جس بَندے دا تاج بَنڑے پَگ،رَہندا نئیں او بندہ عام،

مطلب پِچّھے کردے لوکی جُھک جُھک اونُوں سلام!!!

پَگ رَکھ سِرتے آپ نُوں سمجھے،بندہ اے سُلیمان

ہَتھ چاوے تاں جِھکے لَگّن، اونوں سَت اَسمان

پِگّاں پِچھے سُنڑ نی اَڑیے، وِیراں اَپڑیں وِیر کوہائے

احساس مویاتے،چِٹّے ہوئے، خُون بَنداں دے ہائے

پَگّاں سِر تے رَکھ کہ مَرداں،اَپڑاں مانڑ وَدھایا

رُل گئی عورت،کَھپ گئی عورت، اوہدا شان گَھٹایا

عِشق، مَحبت، پِیار بُھلاوے، پَگاں دا خُمار

جانی دشمن بَنڑ جاندے، جہڑے ہوندے جِگری یار

جَگ توں وَکھری، نِت اَنوکھی، ہےپَگاں دی شان

پَگاں ہویّاں ماہگِیاں سَکھیے، سَستی ہوئی اے جان

عورت دی تذلیل دی خاطر ،مرداں پَگ سَجائی

بھُل جاندے نے پگ نَشے وِچ دِھیاں، بَھینڑاں ، مائی

چِٹّے رَنگ دی پَگ نی اَڑیے ، شیشہ ویکھ کہ سَنگدی

اَپڑیں آپ نُو رَنگَنڑ لَئی اے لہُو عورت دا مَنگدی

لال لہُو نال آپ نُوں رنگ کے، پَگ بَنڑ گئی تلوار

کَئی واری اس دے آکھے لَگ کے، عورت ہوئی سَنگسار

پَگ مَرداں دا کُل اَثاثہ ، پَگ اے قیمتی مال،

فیصلہ سُنڑ کے پَگاں دا دِھی کُھو اِچ ماری چھال

اَنّھے ،گُنگے،ڈورے ٹُر پَئے پَگ وکھایا راہ،

حاجی صاحب دی غیرت جاگی، بَھینڑ نو لایا پھاہ۔

سَنڑ نی میری بھولی سَکّھی اے ہے پگاں دی شان

جَد وی پَگاں جوش اِچ آون ہوندا عورت دا نقصان۔