Ghazal By Sahar Balrampuri

کیسے کیسے محبت کے مارے ہوئے، بہرِ اظہار آئے، لجائے، گئے

وہ تو ہم تھے کہ جو تم سے جھجکے نہیں، مدعا کہہ دیا، مسکرائے گئے

اپنی دھن میں اٹھے، گرتے پڑتے ہوئے، آخرِ کار منزل پہ آ کر جمے

تشنگی دیکھ کر اپنی آنکھوں سے تم، جام پر جام ہم کو پلائے گئے

گرد اڑتی رہی، نقش مٹتے رہے، دھیرے دھیرے تم آنکھوں سے اوجھل ہوئے

وقتِ رخصت ہمارا عجب حال تھا، دیر تک ہاتھ اپنے ہلائے گئے

تم نے دیکھیں نہیں آنسؤوں کی لڑی، ہچکیاں، سسکیاں، آہ، نالے، فغاں

دیکھتے تو کچھ احساس ہوتا تمہیں، ہجر میں کتنے اعزاز پائے گئے

بے وفا، بے مروت، بد اندیش ہو، تند خو، سنگ دل ہو، دغاباز ہو

اچھے خاصے ہنر تم میں موجود تھے، ایک اک کر کے سارے گنائے گئے

ذرہ بھر شرم و غیرت بچی ہو اگر، سوچیے کتنے افسوس کی بات ہے

شیر کی زندگی جینے والے بشر، پالتو بھیڑیوں سے ڈرائے گئے

بات بے بات دنیا سے پنگے ہوئے، بارہا مات دینے کی سازش ہوئی

سرخروئی ہمارا مقدر بنی، باوجود اس کے ہم آزمائے گئے

درد بڑھتا رہا، ٹیس اٹھتی رہی، زخم روتے رہے، شعر ہوتے رہے

دل دہی کے عوض واہ واہی ملی، دھیرے دھیرے سب اپنے، پرائے گئے

بزمِ جاناں میں ہر کوئی غمگین تھا، کارگر کوئی ترکیب ہوتی نہ تھی

سب کے چہروں پہ آئی نہ جب تک ہنسی، ہم سحر کی غزل گنگنائے گئے