Naat Shareef By Shams Tabrez Anjum

چشمِ الطاف غلاموں پہ سدا کرتے ہیں

شربتِ دید جسے چاہیں عطا کرتے ہیں

اپنی قسمت کو ثریا سے بڑا کرتے ہیں

سرورِ دین کی جو مدح و ثنا کرتے ہیں

دور اس طرح سے ہر رنج و بلا کرتے ہیں

یا نبی یا نبی ہم صبح و مسا کرتے ہیں

ہو نہ مایوس دے آواز ہمیشہ تو انہیں

دور و نزدیک کی سرکار سنا کرتے ہیں

کوئی سائل نہیں لوٹا ہے درِ اقدس سے

جھولی بھر بھر کے وہ خیرات دیا کرتے ہیں

وہ ہو اپنا یا پرایا یا کوئی دشمن ہو

ہر کسی کا مرے سرکار بھَلا کرتے ہیں

جھولیاں بھر کے سوالی کی مدینے والے

اور کیا چاہیے منگتوں سے کہا کرتے ہیں

کچھ نہ بولوں گا کہ حاجت نہیں کچھ کہنے کی

"میری امید سے بڑھ کر وہ عطا کرتے ہیں"

چیر دے سینہ قمر، شمس پلٹ کر آئے

جب اشارہ انہیں محبوبِ خدا کرتے ہیں

چوٹ کھاتے ہیں، لہو جسم سے بہتا ہے بہت

میرے سرکار مگر پھر بھی دعا کرتے ہیں

غسل دیتے ہیں فرشتے انہیں نازوں سے بہت

ان کی ناموس پہ جو جان فدا کرتے ہیں

خلد سوغات میں ان سب کو خدا دیتا ہے

خود کو جو عشقِ شہِ دیں میں فنا کرتے ہیں

دل نہیں کرتا ہمیں ہوش میں آنے کا جب

عشق سرکار میں مدہوش رہا کرتے ہیں

اس کی قیمت کا تعین کوئی تاجر کیا کرے

جو بھی بازارِ مدینہ میں بِکا کرتے ہیں

شکر ہے رب کا ملی ہے یہ سعادت انجمٓ

ان کی توصیف میں ہم نعت لکھا کرتے ہیں