اضافہ شدہ آئٹم

اسلام آباد ۔ (اُردو پوائنٹ اخبارتازہ ترین - اے پی پی۔ 25 جولائی2018ء) مختلف سیاسی جماعتوں کے رہنمائوں اور اہم شخصیات نے اپنے آبائی حلقوں میں ووٹ کاسٹ کئے۔ صدر مملکت ممنون حسین نے قومی اسمبلی کے حلقہ این اے 247 کراچی جنوبی II کے پولنگ سٹیشن میں اپنا ووٹ کاسٹ کیا۔صدر نے کلفٹن کے علاقے کہکشان میں گرین وچ کالج میں قائم پولنگ سٹیشن پر ووٹ ڈالا۔

خاتون اول بیگم ممنون حسین نے بھی اسی پولنگ سٹیشن میں اپنا ووٹ کاسٹ کیا۔ نگران وزیر اعظم جسٹس (ر) ناصر الملک نے سوات میں اپنا ووٹ کاسٹ کیا۔ وہ بدھ کو اپنے آبائی علاقے میں ووٹ کاسٹ کرنے کے لئے یہاں پہنچے اور انہوں نے گلکدہ سوات میں قومی اسمبلی کے حلقہ این اے 3 سوات II اور صوبائی اسمبلی کے حلقہ پی کے 5 سواتIV میں ووٹ ڈالا۔

(جاری ہے)

قومی اسمبلی کے حلقہ این اے 54 اسلام آباد قومی سے آزاد امیدوار حفیظ الرحمن ٹیپو نے اسلام آباد ماڈل سکول فار بوائز بڈھانہ کلاں میں اپنا ووٹ پول کیا، پاکستان پیپلز پارٹی کے چیئرمین بلاول بھٹو زرداری نے لاڑکانہ کے شہر نوڈیرو کے حلقہ این اے 200 میں شہید میجر مجاہد بوائز سکول میں قائم پولنگ سٹیشن میں اپنا ووٹ کاسٹ کیا۔

سابق وزیراعظم اور مسلم لیگ (ن) کے رہنما شاہد خاقان عباسی نے مری میں حلقہ این اے 57 میں اپنا ووٹ کاسٹ کیا۔ پاکستان تحریک انصاف کے چیئرمین عمران خان نے اسلام آباد میں حلقہ این اے 53 میں ڈھوک جیلانی میں قائم پولنگ سٹیشن پر اپنا ووٹ کاسٹ کیا۔ پاکستان تحریک انصاف کے رہنما شاہ محمود قریشی نے ملتان کے حلقہ این اے 157 میں گورنمنٹ پرائمری سکول چک نمبر 3 ٹی کے پولنگ سٹیشن پر ووٹ کاسٹ کیا۔

پاکستان پیپلز پارٹی کی رہنما اور شہید بی بی بے نظیر بھٹو کی صاحبزادی آصفہ بھٹو زرداری اور بختاور بھٹو زرداری نے نواب شاہ کے حلقہ این ای 213، پی ایس 38 میں اپنے ووٹ کاسٹ کئے۔ قومی اسمبلی کے حلقہ این اے 125 سے پاکستان تحریک انصاف کی امیدوار ڈاکٹر یاسمین راشد اپنے حلقہ میں ووٹ کاسٹ نہ کر سکیں، ان کا ووٹ این ای125 میں درج نہیں ہے۔ ڈاکٹر یاسمین راشد نے اپنا ووٹ این اے 135 پی آئی اے ہاوسنگ سوسائٹی میں قائم پولنگ سٹیشن پر کاسٹ کیا۔

متحدہ مجلس عمل کے صدر مولانا فضل الرحمن نے ڈیرہ اسماعیل خان میں حلقہ این اے 38 میں ہائیر سکینڈری سکول عبدالخیل میں اپنا ووٹ کاسٹ کیا۔ سابق قائد حزب اختلاف اور پیپلز پارٹی کے سینئر رہنما سید خورشید احمد شاہ نے اسلامیہ کالج پولنگ سٹیشن سکھر میں اپنا ووٹ کاسٹ کیا۔ سابق وفاقی وزیر خواجہ سعد رفیق نے لاہور کے حلقہ این اے 131میں اپنا ووٹ ڈالا۔

سابق وزیر اعظم اور پاکستان پیپلز پارٹی کے مرکزی رہنماء راجہ پرویز اشرف نے موہری راجگان میں ووٹ ڈالا۔ لاہور کے قومی اسمبلی کے حلقہ این اے 125 میں پاکستان مسلم لیگ (ن) کے امیدوار وحیدعالم خان نے اپنا ووٹ کاسٹ کیا۔ عوامی مسلم لیگ کے سربراہ شیخ رشید نے راولپنڈی کے حلقہ این اے 62 میں اپنا ووٹ کاسٹ کیا۔قومی اسمبلی کے حلقہ این اے 54 اسلام آباد سے پاکستان مسلم لیگ (ن) کے امیدوار انجم عقیل خان اور آزاد امیدوار زبیر فاروق خان نے اسلام آباد ماڈل کالج فارگرلز گولڑہ کے پولنگ سٹیشن پر اپنا ووٹ کاسٹ کیا۔

سپریم کورٹ کے چیف جسٹس میاں ثاقب نثار نے لاہور کے حلقہ این اے 130میں برکت مارکیٹ لاہور میں قائم پولنگ سٹیشن پر اپنا ووٹ ڈالا۔ پاک سرزمین پارٹی کے سربراہ مصطفی کمال نے کراچی کے حلقہ این اے 243 کے ایم ایس پبلک سکول کے پولنگ سٹیشن میں اپنا ووٹ کاسٹ کیا، فریال تالپور نے نوڈیرو میں حلقہ این اے 200 اور پی ایس 10گورنمنٹ پرائمری سکول 2، مسلم لیگ (ن) کی امیدوار و سابق وفاقی وزیر تہمینہ دولتانہ نے وہاڑی کے حلقہ این اے 164 میں پولنگ سٹیشن نمبر 19 گورنمنٹ اسلامیہ ہائی سکول اور گورنر سندھ محمد زبیر عمر نے ڈی ایچ اے ماڈل ہائی سکول فیز 7خیابان ہلال کراچی میں ووٹ کاسٹ کیا۔

سابق آرمی چیف جنرل (ر) راحیل شریف نے لاہور کے حلقہ این اے 129میں اپنا ووٹ کاسٹ کیا، انہوں نے قطار میں لگ کر اپنی باری کا انتظار کیا۔چیئرمین سینیٹ محمد صادق سنجرانی نے اپنے آبائی علاقے نوکنڈی کے کلی کسٹم کی گورنمنٹ گرلز ہائی اسکول میں واقع پولنگ اسٹیشن میں پی بی 34 اور این اے 268 کے لیے اپنا ووٹ ڈالا۔ پاکستان مسلم لیگ (ن) کے صدر شہباز شریف نے جونیئر ماڈل سکول اے بلاک ماڈل ٹائون لاہور میں اپنا ووٹ کاسٹ کیا۔

سابق وزیراعظم محمدنواز شریف اور سابق وزیر اعلی شہباز شریف کی والدہ بیگم شمیم اختر نے لاہور کے حلقہ این اے 124 میں اپنا ووٹ کاسٹ کیا۔ قومی اسمبلی کے حلقہ این اے 52 سے مسلم لیگ (ن) کے امیدوار سابق وفاقی وزیر ڈاکٹر طارق فضل چوہدری نے اسلام آباد ماڈل ہائی سکول جابہ تیلی کے پولنگ سٹیشن میں اپنا ووٹ کاسٹ کیا۔گورنرخیبرپختونخواانجینئراقبال ظفرجھگڑا نے بدھ کو پشاورمیں ناصرگھڑی میں عام انتخابات 2018ء کے سلسلے میں اپنا ووٹ کاسٹ کیا۔ گوجرخان حلقہ این اے 58 سے تحریک انصاف کے الحاج چوہدری محمد عظیم، مسلم لیگ ن کے راجہ جاویداخلاص نے اپنے ووٹ اپنے آبائی پولنگ اسٹیشنوں پر ڈالے۔