Lee Betha Ter Naam Sumandar K Kinare, Urdu Ghazal By Afzaal Naveed

لے بیٹھا تِرا نام سمندر کے کِنارے

پھِر ہونے لگی شام سمندر کے کِنارے

مہتاب نِکلتے ہی اُکھڑتی تھیں طنابیں

تھا باد کو سَرسام سمندر کے کِنارے

ہر موج سے اِک قوسِ قزح نِکلی ہُوئی تھی

تھا میلۂ اجسام سمندر کے کِنارے

اِک بات ہے جو شہر میں ہو سکتی نہیں ہے

چلتے ہیں کِسی شام سمندر کے کِنارے

کہنے پہ مرے گھر میں وہ آئے نہیں آئے

لے جاؤں در و بام سمندر کے کنارے

اِک طِفل کے ہاتھوں نے بنا ڈالے گھروندے

ساحِل تھا پڑا خام سمندر کے کِنارے

آنکھوں میں رہا عکس کسی دوسرے تٹ کا

ہونٹوں پہ رہا نام سمندر کے کنارے

کھونے لگا ہر لہر کی خاموشی کے اندر

ہونے لگا ہنگام سمندر کے کنارے

آنکھوں کی شفق پانیوں میں گرنے لگی تھی

ٹوٹا پڑا تھا جام سمندر کے کنارے

بانہوں کو جو پھیلاتے ہی افلاک کو دیکھا

بل کھا گئے اجرام سمندر کے کنارے

تھا نیند کا غلبہ کہ مکیں نِکلے ہُوئے تھے

دھونے کفِ آلام سمندر کے کِنارے

برفیلی ہواؤں میں کمی آنے لگی تھی

پھر جمع تھے اصنام سمندر کے کنارے

رکھتا ہُوں اگر کوئی جھلک دیکھنا چاہے

گوہر کا اِک اِکرام سمندر کے کِنارے

دِن رات کی آوازوں نے پیچھا نہیں چھوڑا

جا کر ہُوا آرام سمندر کے کِنارے

تھا پِچھلے پہر غُسل کا اعلان سو پہنچا

مَیں باندھ کے احرام سمندر کے کِنارے

گُم تھا مَیں کِسی اور سمندر کی جھلک میں

پی کر مۓ گُلفام سمندر کے کِنارے

کشتی کوئی لے کر چلے جاتے ہیں وہ بولی

ہاتھوں کو مِرے تھام سمندر کے کِنارے

اُس روز مُجھے آگے نِکل جانا پڑا تھا

نِکلا نہ مِرا کام سمندر کے کِنارے

بیٹھا ہُوں بہت جا کے نوید آئے نہ لیکِن

گُذرے میرے ایّام سمندر کے کِنارے