Yeh Hath Apna Mere Hath Main Thama Dijye, Urdu Ghazal By Anwar Anjum

یہ ہاتھ اپنا مرے ہاتھ میں تھما دیجے

تھکا ہوا ہوں ذرا دل کو حوصلہ دیجے

بس اب ملے ہیں تو کیجے نہ آس پاس کا خوف

جو سنگ راہ ملے پاؤں سے ہٹا دیجے

یہ اور دور ہے اور سب یہاں مجھی سے ہیں

وہ کوہ کن کی حکایات سب بھلا دیجے

نہیں ہے آپ کو فرصت اگر توجہ کی

تو میں بھی لوٹتا ہوں گھر کو آ گیا دیجے

مرا وجود بھی ہے آپ کی جبین کا داغ

اسے بھی حرف غلط کی طرح مٹا دیجے

کل آپ نے جو چھڑایا تو چھٹ سکے گا نہ ہاتھ

جو الجھنیں ہیں مجھے آج ہی بتا دیجے

یہ کھیل کھیلا ہے جب پیار کا تو پھر اے دل

اب اپنے آپ کو بھی داؤ پر لگا دیجے

تمام عمر بھٹکتی رہی نظر کہ کہیں

ملے کوئی جسے نذرانہ وفا دیجے

مری تو جنبش لب بھی ہے ناخوشی کا سبب

اب آئی ہے کوئی طرز بیاں سکھا دیجے

وفا ہے جرم تو اقرار جرم ہے مجھ کو

یہ میں ہوں یہ مرا دل لیجئے سزا دیجے

وہ سہمے سہمے جدائی کے مضطرب لمحے

مری نگاہ میں اک بار پھر بسا دیجے

گیا نہیں ہے ابھی دور آپ کا انجمؔ

جو دل اداس ہو پھر سے اسے صدا دیجے