Hamain Mar Gayi Teri Chah Peya, Urdu Ghazal By Arshad Malik

ہم تیری کھوج میں گم ہو کر

تاروں کے نگر میں جا پہنچے

اُس طور سے بھی ہو آئے ہم

جس طور تلک موسیٰ پہنچے

ہر منزل تیری منزل ہے

ہر گام ہے روشن راہ پیا

ہمیں مار گئی تری چاہ پیا

ہم دشتِ طلب میں پہنچے تو

تبریز نہ تھا ، منصور نہ تھا

منزل کی خبر دے عاشق کو

یہ دنیا کا دستور نہ تھا

معلوم نہ تھا یہ راز ہمیں

ہر راہ ہے تیری راہ پیا

ہمیں مار گئی تری چاہ پیا

کیا نیند سے لیتے پرسئہ جاں

ہم خواب سے جی بہلاتے کیا

ہر بات عیاں تھی چہرے سے

ہم آنکھ میں اشک چھپاتے کیا

کب پہلے محبت کی ہم نے

کب عشق سے تھے آگاہ پیا

ہمیں مار گئی تری چاہ پیا

خود خیرو شر میں فرق کرو

ایمان گہِ تفریق ہے یہ

جو مہر ہے اپنے ماتھے پر

مہراب نہیں تصدیق ہے یہ

ہمیں اپنا مان لیا تو نے

اور بخش دی سجدہ گاہ پیا

ہمیں مار گئی تری چاہ پیا

پھر بھید کھلا اک دن ہم پر

اس دل میں کہیں موجود ہے تو

ہر دھڑکن تیری شاہد ہے

ہر دھڑکن کا مشہود ہے تو

آباد ہے تیرے جلووں سے

احساس کی یہ درگاہ پیا

ہمیں مار گئی تری چاہ پیا

یوں اپنی خاک پہ چل چل کر

ہم راہ میں تیری گرد ہوئے

پھر روح ہماری سبز ہوئی

پھر جسم ہمارے زرد ہوئے

ہم خاک نشینوں کے دم سے

آباد تری درگاہ پیا

ہمیں مار گئی تری چاہ پیا

ہم سچے عاشق ہیں تیرے

ہمیں اپنی چھاوں میں رکھا کر

ہم خاک ہیں تیرے رستوں کے

ہمیں اپنے پاوں میں رکھا کر

ترے مان سمان سے عشق ہمیں

ترے حسن سے رسم و راہ پیا

ہمیں مار گئی تری چاہ پیا

جب گرہ کھلی معلوم ہوا

اس دنیا کے سلطان ہیں ہم

ہم سارے صحیفوں سے افضل

ہم خاک نہیں انسان ہیں ہم

ہم ارشد سب سے روشن ہیں

اور ہیچ ہیں مہر و ماہ پیا

ہمیں مار گئی تری چاہ پیا