Mukalma Akhri Imkaan Hai, Urdu Ghazal By Fakhra Noreen

تو کیا سوچ کر دونوں اس

بددعائے ہوئے شہر میں آبسے ہیں

جہاں تیز تر زندگی کا سفر ہے

جہاں دن کا مطلب ہے

خونی بلا کے تعاقب سے بچنا

نیا دن ,

کسی دیو قامت بلا کی طرح شوکتا ہے

میں اس کی توجہ بٹانے کی کوشش میں

خود کو بچانے کی فرصت کی خاطر

مٹی جا رہی ہوں

کہاں؟ میں کہاں ہوں

اگر میں نہیں ہوں تو تم بھی کہاں ہو

مدور مشینی

گراری بنے گھومتے جا رہے ہو

تمہارے لیے گردشِ مستقل زندگی کی خبر ہے

تمہیں اپنے معمول میں کیا خبر ہو کہ میں کھو گئی ہوں

تمہارے تعاقب میں جنگل کی اس کھونٹ کو آ گئی ہوں

جہاں عشق پیچاں کی بیلیں نہیں ہیں

مگر مینڈرک بے تحاشا اگے ہیں

ذرا بے دھیانی سے ان کو اکھیڑا جو

میں بھی مری اور تم بھی مرو گے

تو کیا مینڈرک کی دہائی سنو گے؟؟؟