Subha Roshan Ka Badan Khoon Main Tar Hai Haye, Urdu Ghazal By Faqeeh Haidar

صبح روشن کا بدن خون میں تر ہے ہائے

ہے زمیں سرخ گگن خون میں تر ہے ہائے

سربریدہ ہیں دریدہ ہیں سبھی لاشوں کے

جس کو دیکھو وہ کفن خون میں تر ہے ہائے

ماتمی دھوپ اتر آئی ہے ہر رستے پر

آج پھر خاک ِ وطن خون میں تر ہے ہائے

روشنی میرے چراغوں کی بنی ہے مقتول

طاق بے نور پون خون میں تر ہے ہائے

دیدہء نم میں بھروں رنگ میں کیا پھولوں کے

دوستو سارا چمن خون میں تر ہے ہائے

جابجا شام غریباں کی شفق کے آثار

جابجا نوحہ گری کرتے عزادار ہیں بس

کربلا بنتے ہوئے شہر کے چوراہوں میں

سوگ میں لپٹی ہوئی راتوں کے آثار ہیں بس

خامشی طاری ہے ہر صحن میں زنداں کی طرح

زرد چہروں پہ نئے خوف نمودار ہیں بس

سانس در سانس بڑھا جاتا ہے وحشت کا صور

میری بستی میں یہی جینے کے معیار ہیں بس

حاکم وقت کے دربار میں ہے آج بھی جشن

مرنے والوں کے لیے سوگ میں اخبار ہیں بس

اب کے کچھ اور طرح اجڑی ہیں گلیاں میری

اب کے کچھ اور طرح عہد بہاراں دیکھا

پرسہ دیتی ہوئی آنکھوں میں سجائے آنسو

رنج ِ احباب کہیں ماتم ِ یاراں دیکھا

آشیاں برق تلے آیا نہیں پہلی بار

کھیل یہ حشر نما بار ہزاراں دیکھا

پہلے بھی آگ نے پھونکی ہیں کئی نسلیں مری

ہم نے پہلے بھی دھواں صبر نگاراں دیکھا

یوں جنازوں کی قطاریں کبھی دیکھیں پہلے

یوں لٹا شہر کبھی درد کے ماراں دیکھا ؟؟

سر مقتل کھڑی ہیں مائیں جواں لاشے لیے

دے رہی ہیں بے ردا بہنیں صدائیں کتنی

لوریاں خاک میں بچوں کی ملائیں کتنی

اور تجھ میں اے زمیں خوشبو بسائیں کتنی

طائراں اڑتے نہیں دیکھے بڑی مدت سے

کرب میں ڈوبی ہیں بستی کی ہوائیں کتنی

شام کے سائے درختوں پہ اتر آئے ہیں

پھوٹتی ہیں سبھی لاشوں سے شعاعیں کتنی

ان اندھیروں میں بنا راہ سحر کی کوئی

مانگتے ہیں ترے یہ عاصی دعائیں کتنی

قاتلا میرے شہیدوں کا لہو غور سے دیکھ

سرخرو کون ہے اے میرے عدو غور سے دیکھ

ہم نے کرنی ہے مذمت ہی فقط کچھ دن بس

پھر وہی جشن وہی غوغے ہمارے ہوں گے

ہم نے لکھنے ہیں ہمیشہ کی طرح نوحے کچھ

بعد میں مست مدھر چہرے ہمارے ہوں گے

پھر کمیٹی ہی بنے گی جو کرے گی تحقیق

خون ِمقتول دکانوں پہ بکے گا سستا

پھر خموشی سے پلٹ جائیں گے گھر سارے لوگ

بے کفن لاشیں تصاویر کی صورت ہوں گی

اینکروں والے سیہ چہرے پڑھیں گے خبریں

ہم خموشی سے سنیں گے تو ہنسیں گے کھل کر

ظلم پہ ہنستے ہیں روتے ہیں برابر ہر بار

سوچیے کتنے الگ پیارے منافق ہیں ہم

ایک طبقے کا طرف دار نہیں ہونا مجھے

حالت ِ حال میں تو سارے منافق ہیں ہم

لااشیں گرتے ہی پہنچتے ہیں اداکاری کو

کون کہتا ہے تھکے ہارے منافق ہیں ہم