Rang Jab Lehja E Khunbar Main Aa Jate Hain, Urdu Ghazal By Junaid Akhter

رنگ جب لہجہء خونبار میں آ جاتے ہیں

شعر جلتے ہوئے افکار میں آ جاتے ہیں

شام ہوتی ہے تو دم لینے کو بن کر جگنو

کتنے سورج ہیں جو اشجار میں آ جاتے ہیں

روز ہی دل پہ برستے ہیں جواہر غم کے

پھر چمکتے ہوئے اشعار میں آ جاتے ہیں

شرم آتی ہے مجھے دیکھ کے جب شاعر بھی

ہاتھ باندھے ہوئے دربار میں آ جاتے ہیں

جب لگے بھولنے والا ہے زمانہ اُن کو

وہ خبر بن کے پھر اخبار میں آ جاتے ہیں

ہاتھ عادی ہو قلم کا تو یہ ہو جاتا ہے

لفظ چلتی ہوئی تلوار میں آ جاتے ہیں

دل کے سورج کا کبھی آپ نے جلنا دیکھا

سائے بھی سایہء دیوار میں آ جاتے ہیں

آسماں سر پہ اُٹھاتی ہے زمیں کی گردش

کتنے چکر ہیں جو رفتار میں آ جاتے ہیں

پھر خبر ہوتی ہے اُن کو بھی چبھن کی اپنی

خار جب وادئ پُرخار میں آ جاتے ہیں

وہ جو چاہے تو اُلٹ جاتی ہے ساری گردش

دائرے گھوم کے پرکار میں آ جاتے ہیں

پھر ہے زُنّار بھی زُنّار کہاں رہتی جب

دانے تسبیح کے زُنّار میں آ جاتے ہیں

مثلِ یوسف تو نہیں آپ کی قسمت اخترؔ

آپ کیوں مصر کے بازار میں آ جاتے ہیں