Deewar, Urdu Nazam By Kashif Aura

آگے بڑھنا اہم نہیں تھا

ٹوٹتے رتھ کی آخری چیخیں

تالی ہونا چاہتیں تھیں اور

ہم سب اپنا آپ بچائے گھر میں چھپ کر بیٹھ گئے تھے

شہر کی سب دیواریں توڑنا

اپنے بس کی بات نہ تھی پر

حق تو یہ تھا سارے شاعر موت کو زندگی کر جاتے

کچھ فیضؔ سی نظمیں کہہ جاتے

یا منٹوؔ کی حمایت کر جاتے

تھوڑی سی ہی محبت کر جاتے

ہنستے ہنستے مر جاتے

پھر بھی ایسا ہو نہ سکا

سو میرے شہر کا ہر اک بونا

مجھ کو طنزاً دیکھ رہا ہے

میں اپنے من کی کھڑکی کھولے

اپنے آپ سے پوچھ رہا ہوں

میں تو اپنے گھر کی چابی اپنی جیب میں ہی رکھتا ہوں

نیلے گیلے برف کے جیسے کورے کاغذ پر بآسانی

پیار کی آگ جلا سکتا تھا

ناؤ تیز چلا سکتا تھا

لیکن اب پچھتانا کیسا!

رتھ کے پہیے ٹوٹ چکے ہیں

موت کو موت نے دیکھ لیا ہے

دل میں بستر ڈال کے سوئی لڑکی جاگنے والی ہے

سو اپنی آنکھیں موند لو کاشفؔ

تیکھے نقش نگاروں والی

خود سے خود سر غصے والی اچھی شاعرہ، کچھ ہفتوں میں

سب کچھ توڑنے والی ہے

اجڑے گھر کی دیواروں پہ کیل کی جگہیں ڈھونڈ رہا ہوں