Mudatoon Ki Piyas, Urdu Ghazal By Professor Rasheed Hasrat

ھم نے مانا پاؤں میں تیرے کوئی زنجِیر تھی

شاعری بھی کُچھ مِری بے رنگ، بے تاثِیر تھی

بے رُخی سے روند کر دل کو گُزر جاتا تھا تُو

جانتا تھا میرے دل کی کیفیت دِلگیر تھی

کِس طرح کی تھی انا، تھا کِس طرح کا اِختلاف

پیار تو آنکھوں میں تیری مُجھ کو دِکھ جاتا تھا صاف

سب صحِیفے پیار کے آنکھیں عیاں کرتی رہِیں

تو بھلے رکھتا تھا مُجھ سے دِل غِلاف اندر غِلاف

وقت ہے ایسا فرس، کہ دوڑتا رہتا ہے یہ

"ہر کِسی پہ مہرباں ہوتا ھوں میں" کہتا ہے یہ

کِس لیئے یہ اِمتیازی فاصلے، یہ دُوریاں

کِرچی کِرچی ھو گا یارو درد جو سہتا ھے یہ

تُو نے سمجھا عُمر بھر مُجھ پر رہے گی مُفلسی

کوئی سمجھا ھے نہ سمجھے گا یہ چالیں وقت کی

بادشاہوں کو گدا ہوتے کہاں لگتی ھے دیر؟

مُجھ گدا پر ایک رحمت کی نظر خالق تِری

اب خُدا کا مُجھ پہ ھے اِتنا کرم بتلاؤں کیا

ہو ہی جاتی ہیں مِری آنکھیں بھی نم بتلاؤں کیا

اور جِتنے دِل کے تھے ارمان پُورے ہو گئے

ایک حسرت ہے کہ مِل بیٹھیں بہم، بتلاؤں کیا

دُور کِتنے سال سے مُجھ سے ہے تُو اندازہ ہے؟

زخم جو دِل کو مِلا تھا اب تلک بھی تازہ ہے

کُچھ لچک پیدا ہُوئی یا آج بھی کل کی طرح

بند مُجھ پر جُوں کا تُوں دل کا تِرے دروازہ ہے

تُو نے گھر اللہ کا توڑا ہے کُچھ معلوم ہے؟

اِس لِیئے تو ایک بھی تُجھ کو خُوشی معدُوم ہے

دل کے جذبوں کا تُجھے واجِب تھا تھوڑا احترام

مُڑ کے دیکھا کیا کبھی، کِس حال میں مظلُوم ہے؟؟

آج بھی ہیں مُنتظِر آنکھیں لِیئے وِیرانیاں

کِتنی مُدّت تک مُجھے گھیرے رہِیں تنہائیاں

کاٹ لی ہے جُرمِ اُلفت کی کڑی میں نے سزا

جانِ اُلفت اِک نظر دِکھلا بھی جا تُو ہے جہاں

اِک نظر بس اِک نظر! اِتنی تو میری مان لے

ایک درشن کی عطا ہو پِھر تو چاہے جان لے

عین مُمکن ہے کہ حسرتؔ آخری خواہِش ہو یہ

اب دلِ برباد پہ احسان کی تُو ٹھان لے