Raaz Giraftagi Nah Aseer Lehan Se Pooch, Urdu Ghazal By RAIS AMROHVI

راز گرفتگی نہ اسیر لحن سے پوچھ

یہ بات اپنی زلف شکن در شکن سے پوچھ

آوارگی کے لطف نہ سرو و سمن سے پوچھ

وحشت میں کیا مزا ہے ہوائے چمن سے پوچھ

مردان حق کا عزم شہیدان حق کا جرم

دلدادگان شیوۂ دار و رسن سے پوچھ

کیا شام غم میں دیدہ و دل پر گزر گئی

ان تازہ واردان بساط کہن سے پوچھ

لذت کشان ساغر عشرت کو کیا خبر

رنج خمار تلخیٔ کام و دہن سے پوچھ

صحن‌ چمن میں لالہ و گل پر ترے بغیر

کیا کیا گزر رہی ہے بہار چمن سے پوچھ

آغاز ارتباط و تعلق کے واقعات

کچھ اپنے ہوش کچھ مرے دیوانہ پن سے پوچھ

اے فصل گل مزاج جراحت رسیدگاں

گر ہو سکے تو لالۂ خونیں کفن سے پوچھ

جو تیری مشق ناز سے پامال ہو گیا

اپنا مزاج‌ ناز اسی خستہ تن سے پوچھ

افسانۂ بہار اسیر قفس سے سن

یاد وطن کا لطف کسی بے وطن سے پوچھ

اے دوست ہم سے کفر محبت کا درس لے

اسرار کافری نہ بت و برہمن سے پوچھ

ہم بھی کبھی تھے انجمن آرائے آرزو

اس جان بزم و زیب دہ انجمن سے پوچھ

ہم بھی کبھی تھے یوسف کنعان رنگ و بو

پیر ضعیف‌ و پیر زن و پیرہن سے پوچھ