Sheher Banu K Liye Aik Nazm, Urdu Nazam By Rehman Faris

تمہیں جب دیکھتا ھوں

تو مری آنکھوں پہ رنگوں کی پُھواریں پڑنے لگتی ھیں !

تمہیں سُنتا ھوں

تو مُجھ کو قدیمی مندروں سے گھنٹیوں اور مسجدوں سے وِرد کی آواز آتی ھے !

تمہارا نام لیتا ھوں

تو صدیوں قبل کے لاکھوں صحیفوں کے مُقدّس لفظ میرا ساتھ دیتے ھیں !

تمہیں چُھو لُوں

تو دُنیا بھر کے ریشم کا مُلائم پن مری پَوروں کو آکر گُدگُداتا ھے !

تمہیں گر چُوم لُوں

تو میرے ھونٹوں پر الُوھی، آسمانی، ناچشیدہ ذائقے یُوں پھیل جاتے ھیں،

کہ اُس کے بعد مُجھ کو شہد بھی پھیکا سا لگتا ھے !

تمہیں جب یاد کرتا ھوں

تو ھر ھر یاد کے صدقے مَیں اشکوں کے پرندے چُوم کر آزاد کرتا ھوں !

تمہیں ھنستی ھوئی سُن لوں

تو ساتوں سُر سماعت میں سما کر رقص کرتے ھیں !

کبھی تُم روٹھتی ھو

تو مری سانسیں اٹکنے اور دھڑکن تھمنے لگتی ھے !

تمہارے اور اپنے عشق کی ھر کیفیت سے آشنا ھوں مَیں

مگر جاناں !!!

تمہیں بالکل بُھلا دینے کی جانے کیفیت کیا ھے !

مجھے محسوس ھوتا ھے

کہ مرگِ ذات کے احساس سے بھر جاؤں گا فوراً !

تمہیں مَیں بُھولنا چاھوں گا تو مر جاؤں گا فوراً !!!