Puchhte Hain Teri Hasrat Kya Hai, Urdu Ghazal By Safdar Mirzapuri

puchhte hain teri hasrat kya hai
aaj mujh par ye inayat kya hai

kya kahun rang-e-tabiat kya hai
ek aafat hai mohabbat kya hai

zabh karte ho jo munh pher ke tum
aisi bhi meri murawwat kya hai

jis mein tum KHush usi mein main KHush hun
ranj kya chiz hai rahat kya hai

bolti hi nahin taswir teri
phir mere jine ki surat kya hai

kisi aawara-watan se puchho
mehrban-wari-e-ghurbat kya hai

zabh ke waqt ruka bhi KHanjar
ye na puchha teri hasrat kya hai

umr guzri usi ke kuche mein
hum se puchho ki mohabbat kya hai

mai ho sabza ho ghaTa ho tum ho
is se achchhi mujhe jannat kya hai

ghair se wada lahad par meri
ye qayamat sar-e-turbat kya hai

ye to hai ain mohabbat ai dil
un ke shikwe ki shikayat kya hai

shaiKH ji roza to din mein hoga
shab ko pine mein qabahat kya hai

mujh se kahti hai ye wahshat meri
ghar mein rahne ki zarurat kya hai

bhul kar bhi na kabhi ye puchha
haal bimar-e-mohabbat kya hai

hum ne KHud pine se tauba kar li
shaiKH sahab ki karamat kya hai

sajde karta hun dar-e-jaanan par
aur aain-e-mohabbat kya hai

zikr-e-mai aur janab-e-waiz
nahin malum ki niyyat kya hai

ek Thokar se uThi hai sau bar
aap ke aage qayamat kya hai

jaan hi le ke Talegi 'safdar'
ek bala hai shab-e-furqat kya hai