Sair-e-chaman Hai Aur Wo Gul-ru Kanar Mein, Urdu Ghazal By Safi Aurangabadi

sair-e-chaman hai aur wo gul-ru kanar mein
main be-piye bhi mast hun ab ki bahaar mein

kab se hun kya bataun talash-e-bahaar mein
ek phul bhi na tha chaman-e-rozgar mein

chaalen nai nai si hain raftar-e-yar mein
paD jaega KHalal rawish-e-rozgar mein

dil aur jaan donon bhi hain kis shumar mein
aap iKHtiyar mein hain to sab iKHtiyar mein

kyun na-umid aap ka ummid-war ho
sab kuchh hai kya nahin nigah-e-sharmsar mein

mujh ko jab apni baat ka rahta nahin KHayal
kyun bad-zani na aae dil-e-raazdar mein

is se ziyaada lutf ka talib nahin hun main
ummid ban ke rah dil-e-ummid-war mein

ya maut aaegi mujhe ya nind aaegi
aur ek shab guzar to dun intizar mein

ai dard-e-ishq baat to jab hai ki mere dost
marne ke baad chain na paun mazar mein

nala KHilaf-e-wada kiya hae kya kiya
sun le jo wo to farq paDa e'tibar mein

wo kyun bulaen bazm mein mujh bad-nasib ko
ghul-mil ke baiThna nahin aata hai chaar mein

main ne bhi tauba toD di apni to kya hua
duniya ke log kya nahin karte bahaar mein

mera waqar aap ka aaram bhi gaya
aaKHir ye kya bala hai dil-e-be-qarar mein

ek taza wardat hai har ek dam ke sath
mere irade aa nahin sakte shumar mein

sau mehrbaniyon ke ewaz muskura diya
sarkar ne kamal kiya iKHtisar mein

hoga jab un ka qahr qayamat hi aaegi
zinde rahenge ghar mein na murde mazar mein

kahte hain log maut se bad-tar hai intizar
meri tamam-umr kaTi intizar mein

niklega ab ke jo bhi tera ai mughan-nawaz
phulon mein rakh ke denge tujhe hum bahaar mein

naseh bhi chaaragar bhi ye do do azab kyun
munkir-nakir aate hain wo bhi mazar mein

khai hui qasam to KHuda ke liye na kha
apni taraf se farq na Dal e'tibar mein

zahid ki tarah aur hain masjid mein saikDon
ye kis shumar mein hai wahan kis qatar mein

ishq aur aap wah safi' wah-wah-wa
gham aur hae zindagi-e-mustaar mein