Aseeb Zada Lashain, Urdu Nazam By Safia Hayat

جنگلوں سے لکڑی کاٹ کر

تابوت بنائے جارھے ھیں۔

کیل ہتھوڑے سمیت دھڑا دھڑ بکنے لگے

سفید کپڑا کم پڑ گیا

تو سوچا گیا۔

آخری لباس کسی اور رنگ کا کیوں نہیں۔۔۔۔۔ ؟

کیونکہ

مردوں نے بھی کفن پہننے سے انکار کر کے

ھڑتال کر دی ھے۔

وہ بینر اٹھائے چپ سادھے

مسلسل احتجاج کر رھے ہیں۔

کہ

انھیں وقت سے پہلے کیوں صلیب پہ لٹکایا گیا۔۔۔۔؟

کیوں بھسم کیا گیا۔۔۔؟

ان کا کہنا ھے کہ

لاشوں کو برف خانوں میں رکھ دیا جائے۔

آخری رسومات اس وقت ادا کی جائیں۔

جب زندہ بھی مر جائیں۔

شہر میں شوروغوغا ھے۔

اور

لوگوں نے جلدی مرنے کا ارادہ کر لیا ھے

جہاز ساحلو ں پہ آ لگے ھیں۔

لاشوں کی ایکسپورٹ تیزی سے بڑھنے لگی

تو۔۔۔۔

زندہ مردوں کو رشک کی نگاہوں سے

دیکھتے ھوئے

اپنے جینے پہ شرمسار ھونے لگے