Niswani Qehqaha, Urdu Nazam By Safia Hayat

"نازک کلائیاں اب نازک نہیں رہیں"

لڑکی نے زرتار دوپٹہ کو تہہ کرتے کہا

"فاتح دل پہ قبضہ نہیں کر سکتے تم"

اور سنو

"یہ مونچھوں کو تاوء مت دو

ارے تم اشرف المخلوقات ھو نا۔۔۔؟

مگر عجب ھے

شیر بھی ریپ نہیں کرتا

باہمی رضامندی کا خیال رکھا جاتا ھے۔"

"جنگل میں سب جوڑے

اپنی مرضی اور خوشی سے جیتے ہیں۔

ہم نے جنگل کاٹ کر بستیاں بسائیں

اچھا نہیں کیا

ابھی بھی

زور آور کمزور کو ہڑپ کر جاتا ھے۔"

لڑکی نے پیشانی پہ چپکی بندیا اتارتے کہا

مونچھیں غرائیں

"تم منکوحہ ھو اب میری"

"ہا ہا ہا

ہا ہا ہا"

ہنسی سے دہری ھوتی آواز نے

نئے نویلے رشتہ کا تمسخر اڑایا

تمہیں یاد ھے۔۔۔؟

ڈرامہ شروع ھونے سے پہلے

میں نے

تمہارا نام اختیارکرنے سے انکار کیا تھا۔

اب بھی ھے۔

لو یہ چوڑیاں پہن لو

یا

پھر شیر بنو