Main Or Wo, Urdu Nazam By Safia Hayat

میں اور وہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چلمنوں میں چراغ بجھنے لگے

گرجتے کڑکتے بادلوں کی آگ زعم کا زہر چاٹنے لگی

خوف کے خول میں سہمی ہوائیں

سانس کی سر سراہٹیں

سانپ کی لکیر بننے لگیں۔

طوفانوں کی زد میں آئے پتوار دن

راتوں کے بھنور بننے لگے

گرمئی جذبات سے پگھلتا سرد سراپا کیا سرکا

زرد موسم شاخوں سے الجھنے لگا

کتب خانے میں پڑی کتابیں

بے کار بحث سے تھک کر بیٹھ گئیں۔

ہجر و فراق کے جنگلوں سے گزرتی

زمانوں سے دور روح

اپنے بدن کی مٹی کو کھرچنے لگی۔

جب خباثت کی طاقت نے

متعفن سوچ کا کیچڑ

پوتر وجود پہ گرایا

لا متناہی پہاڑوں کی بلندی سےوہ لڑھکتی

خود ہی حجاب اورآئینہ بننے لگی

زندگی کے لئے گیت کی تلاش میں

سر گرداں ماری ماری پھری

ایوانوں میں آواز گونجی

خدا کوئی گیت نہیں لکھ سکتا۔

نہ گا سکتا ھے

اسے جب لکھنا ھوتا ھے

وہ وقت کی کوکھ سےشاعرہ کو پیدا کرتا ھے۔

وہ اس "صفیہ " کو نظم دیتا ھے

اسکی " حیات" کو حیات دیتا ھے

جو اپنے شعروں سے مشرق سے مغرب کو

اور مغرب سے مشرق دیکھ سکتی ہے

ہاں

اس سے کیا بعید ہے!