Lams Apni Kahani Nahin Bhulta, Urdu Nazam By Sahar Ali

dil nahin manta
mujh ko sach sach bata
aaj bhi tere kamre ki kori mahak
DhunDhti hai mujhe
tere sune dariche ki bekal hawa
jis ne pakDa tha ek roz daman mera
jab tere pas aai wo jaan-e-wafa
tujh se puchha mera
shelf mein rakkhi sari kitabon ke upar jami dhul mein
un mein rakkhe hue kasni phul mein
tere mamul mein
ab bhi maujud hun
ghaur se dekh le
ghar ke rauzan se aati rupahli kiran
us ko lagta nahin ghar ka KHali badan
kya mere KHwab ki koi TuTi kaDi
tere bistar pe hai ban ke silwaT paDi
kya tere narm takiye pe aansu mere
aaj bhi jazb hain
wo tere lamp ki dudhiya raushni
tujh se teri udasi nahin puchhti
teri tanhai ke KHwab mahaul mein
khankhanati hai kya meri pagal hansi
kya teri diary ke mahakte waraq
mere bare mein kuchh bhi nahin puchhte
kya kisi harf ne tujh ko Toka nahin
siDhiyon pe teri
KHushnuma phul ki
wo jo belen thin wo aate-jate hue
kya tera rasta bhi nahin roktin
mujh ko sach sach bata
be-KHayali mein kya
meri yaadon ko tu ne rakha ho kahin
aur DhunDa kahin
dil ko kyun hai yaqin
ishq gar bhul jaana bhi chahe kabhi
lams apni kahani nahin bhulta