Bhulne Ki Ho Gai Bekar Har Tadbir Dekh, Urdu Ghazal By Santosh Purswani Sant

bhulne ki ho gai bekar har tadbir dekh
rang sau dikhla rahi hai ye teri taswir dekh

jaanta hun ek samundar ki tamanna hai tujhe
aa meri aankhon mein apne KHwab ki ta۔bir dekh

wo tujhi mein hai nihan jis ki hai tujh ko justuju
ban ke ranjha aaine mein apne aks-e-hir dekh

jab mili manzil to mera ham-safar hi kho gaya
bad-nasibi is ko kahte hain meri taqdir dekh

ratjagon se rabt hai aur wasl ki KHwahish nahin
ab inayat kar rahi hai hijr ki tasir dekh

apne mazi se sabaq le aur mustaqbil sanwar
waqt ki peshaniyon pe hai likhi tahrir dekh

ru-ba-ru hai mai magar tu us ko chhu sakta nahin
pyas ki hasrat se pahle panw ki zanjir dekh

ilm ki daulat ke aage KHam hain taj-o-taKHt bhi
sar jhukati hai qalam ke ru-ba-ru shamshir dekh

aib mere ginne wale KHud ko bhi parkha kabhi
war se pahle ye behtar hai tu apna tir dekh

mujh ko pala hai ghazal ne mamta ki chhanw mein
bas adab ke waste hi hai meri tauqir dekh

hae kaisi ho gai ahl-e-siyasat ki zaban
banTti insan ko hai un ki har taqrir dekh

be-hisi ko toD de ab to pighal ai sang-dil
kam se kam tu 'sant' ki aankhon se chhalka nir dekh