KHuda Ke Waste Kuchh Din Ho Mehrban Sayyaad, Urdu Ghazal By Sayed Ahmad Hussain Shafiq Lakhnavi

KHuda ke waste kuchh din ho mehrban sayyaad
na kar bahaar mein mujh ko rawan-dawan sayyaad

baDhi hai had se siwa garmi-e-fughan sayyaad
ki ab to KHushk hui jati hai zaban sayyaad

guzishta haal mujhe apna yaad karne de
sunaunga tujhe phir apni dastan sayyaad

qafas mein dekh ke afsurda mehrbani ki
suna raha hai mujhe apni dastan sayyaad

gharaz ye hai ki rahun hashr tak asir tera
mare pe kaTna meri na beDiyan sayyaad

asir kahte hain sab meri bad-zabani se
ajab nahin ki abhi kaT le zaban sayyaad

paron ko khol ke us ko duaen deta hai
jo kuchh asir pe hota hai meherban sayyaad

zamana qaid mein guzra to ki hai dil-jui
ki rafta rafta hua hai mizaj-dan sayyaad

asir tu ne kiya hai tujhi se kahna hai
bura bhala mujhe kahna hai baghban sayyaad

kiya hai qaid magar ye bata KHuda ke liye
chaman se le ke mujhe jaega kahan sayyaad

qafas ke pas agar aa ke baiTh dam bhar ko
maze ki tujh ko sunaunga dastan sayyaad

chaman se dasht mein jaana hai bulbulon ka muhaal
suna hai rah mein luTega karwan sayyaad

use shajar ko giraya hai bagh mein tu ne
ki jis ki shaKH pe tha mera aashiyan sayyaad

na aashiyan hai na main hun na hai qafas baqi
samajh samajh ke miTaya mera nishan sayyaad

yaqin hai ki kisi roz dil ko thamega
suni asiron ki chhup-chhup ke dastan sayyaad

jo ab zaban se karun jal ke KHak ho jaen
barae nam qafas ki hain tiliyan sayyaad

kare asiron pe jo zulm tujh ko zeba hai
zamin teri hai tera hai aasman sayyaad

hui hai qaid mein muddat ki kuchh bhi yaad nahin
ki thi bahaar gulistan mein ya KHizan sayyaad

asar to dekh main zikr-e-bahaar karta hun
ki sabz hongi qafas ki bhi tiliyan sayyaad

'shafiq' zabt kiya aisa aah-e-sozan ko
jigar se ab mere uThne laga dhuan sayyaad