حکومت چاہےتوڈیموں کےتعمیری فنڈ کوٹیک اوورکرلے،چیف جسٹس

انتظامیہ کےکام میں مداخلت نہیں کریں گے،فنڈزاکٹھا کرنا ججزکا کام نہیں، کل درگاہ گیا تومجھے کسی نے5لاکھ کا چیک دیا، لوگ ڈیمزکی تعمیرکیلئے فنڈزدینا چاہتے ہیں، کالا باغ ڈیم کو قوم کے اتفاق پر چھوڑ رہے ہیں۔چیف جسٹس ثاقب نثار کے ریمارکس

پیر 30 جولائی 2018 20:34

اسلام آباد(اُردو پوائنٹ اخبار آن لائن۔ پیر 30 جولائی 2018ء) چیف جسٹس آف پاکستان جسٹس ثاقب نثار نے کہا ہے کہ حکومت چاہے تو ڈیموں کی تعمیر کے فنڈ کو ٹیک اوور کرلے، انتظامیہ کے کام میں مداخلت نہیں کریں گے، ڈیموں کیلئے فنڈز اکٹھا کرنا ججز کا کام نہیں ہے، حکومت اگر فنڈز اکٹھے کرسکتی ہے تو کرے، کل درگاہ گیا تومجھے کسی نے5لاکھ روپے کا چیک دے دیا، لوگ ڈیمزکی تعمیرکے لیے فنڈزدینا چاہتے ہیں، انہوں نے کہا کہ لوگ چاہتے ہیں ڈیمز فنڈز کی نگرانی عدالت کرے۔

ڈیمزکا ڈیزائن کیا ہوگا ٹھیکہ کس کودینا ہے یہ ہمارا کام نہیں۔ انتظامیہ کے کام میں مداخلت نہیں کریں گے۔ انہوں نے کہا کہ کالا باغ ڈیم کو قوم کے اتفاق پر چھوڑ رہے ہیں۔کالاباغ پرجب کبھی اتفاق ہوگا وہ بھی بن جائےگا۔

(جاری ہے)

جن ڈیمز پرتنازع نہیں ہے ابھی اسی پر فوکس ہے۔ پیر کو سپریم کورٹ میں چیف جسٹس ثاقب نثار کی سربراہی میں دیامیر بھاشا اور مہمند ڈیم کیس کی سماعت ہوئی۔

سماعت کے دوران چیف جسٹس نے کہا کہ جن ڈیموں پر تنازع نہیں ہے وہ ڈیم بنیں گے، ابھی انہی پر فوکس ہے تاہم کالا باغ ڈیم پر جب کبھی اتفاق ہوگا تو وہ بھی بن جائے گا۔انہوں نے کہا کہ ڈیمز کا ڈیزائن کیا ہوگا، ٹھیکہ کسے دینا ہے، یہ ہمارا کام نہیں ،ہم ریاست اور انتظامیہ کے کام میں مداخلت نہیں کریں گے۔انہوں نے کہا کہ الیکشن کی وجہ سے فنڈز میں پیسے نہیں آسکے، اگر حکومت فنڈز اکٹھے کرسکتی ہے تو کرے ،حکومت چاہے تو قائم فنڈز کو ٹیک اوور کرلے کیوں کہ عدالت کے ججز کا کام نہیں کہ فنڈز اکٹھے کریں۔

چیف جسٹس نے کہا کہ لوگ چاہتے ہیں ڈیمز فنڈز کی نگرانی عدالت کرے، کل درگاہ کی حاضری پر مجھے کسی نے 5 لاکھ کا چیک دیا، لوگ اب پانی کے ضیاع پر بھی توجہ دے رہے ہیں اور ڈیمز کی تعمیر کیلئے فنڈز دینا چاہتے ہیں۔اس موقع پر جسٹس عمر عطا بندیال نے کہا کہ ڈیمز بنانا عدالت کا کام نہیں، عدالت صرف حکومت کی مدد کر رہی ہے۔انہوں نے سوال اٹھایا کہ ڈیمز کے فنڈز سے رقم کیسے جاری ہوگی کیونکہ زلزلہ متاثرین کے فنڈز دوسرے منصوبوں میں استعمال ہوگئے تھے۔

چیف جسٹس نے اعتزاز احسن سے مکالمہ کیا کہ کیا عدالت کا ڈیمز کیلئے فنڈز بنانے کا فیصلہ درست ہی جس پر اعتزاز احسن نے کہا کہ ڈیمز کیلئے فنڈز بنانے کا فیصلہ درست اور اچھا ہے۔چیف جسٹس نے کہا کہ 9 سال کی بچی نے اپنے سکول کے بچوں سے 5300 روپے اکٹھے کرکے مجھے دیئے ہیں، آنے والی نسلوں کو بچانے کیلئے کچھ کرنا پڑے گا۔ انہوں نے کہا کہ ڈیمز کی تعمیر کیلئے درکار رقم ہماری استطاعت سے بڑھ کر ہے۔

چیف جسٹس نے کہا کہ بجلی کے بلوں میں ناجانے کون کون سے ٹیکس اور سرچاج شامل کردیئے جاتے ہیں اس لئے بجلی کے بلوں پر ہوشربا ٹیکسز پر بھی نوٹس لیں گے۔انہوں نے کہا کہ غریب لوگوں کے پاس کھانے کے پیسے نہیں، وہ اتنے ٹیکسز کیسے دے سکتے ہیں انڈس واٹر ٹریٹی سے متعلق چیف جسٹس نے کہا کہ عالمی معاہدہ یا ٹریٹی کرنا حکومت کا کام ہے، عدالت ٹریٹی سے متعلق حکومت کو ہدایت یا حکم کیسے دے سکتی ہی حکومت کو کیسے کہہ سکتے ہیں کہ معاملے کو عالمی سطح پر اٹھائے۔ بعدازاں عدالت نے ڈیمز کی تعمیر سے متعلق کیس کی سماعت غیر معینہ مدت تک کیلئے ملتوی کردی۔