تحریک انصاف کا قومی اسمبلی اور پنجاب میں مطلوبہ اراکین کی تعداد حاصل کرنے کا دعوی

وفاق اور پنجاب میں حکومت ہم بنائینگے، خیبرپختونخوامیں ہمارے پاس دو تہائی اکثریت موجود ہے ،بلوچستان میں بھی مخلوط حکومت بنائی جائیگی ،فواد چودھری وزیراعلی پنجاب تحریک انصاف سے ہی ہوگا، وفاقی کابینہ میں اتحادیوں کو نمائندگی دینے کا فیصلہ عمران خان کرینگے، میڈیا سے گفتگو

پیر 30 جولائی 2018 21:03

اسلام آباد (اُردو پوائنٹ اخبار آن لائن۔ پیر 30 جولائی 2018ء) پاکستان تحریک انصاف کے ترجمان فواد چودھری نے قومی اسمبلی اور پنجاب میں مطلوبہ اراکین کی تعداد حاصل کرنے کا دعویٰ کرتے ہوئے کہا ہے کہ وفاق اور پنجاب میں حکومت ہم بنائینگے، خیبرپختونخوا میں ہمارے پاس دو تہائی اکثریت موجود ہے جبکہ بلوچستان میں بھی مخلوط حکومت بنائی جائیگی ،وزیراعلی پنجاب تحریک انصاف سے ہی ہوگا، وفاقی کابینہ میں اتحادیوں کو نمائندگی دینے کا فیصلہ عمران خان کرینگے۔

پیر کو پاکستان تحریک انصاف کے ترجماد فواد چودھری نے میڈیا سے گفتگو میں پنجاب اور قومی اسمبلی میں مطلوبہ اراکین کی تعداد حاصل کرنے کا دعویٰ کرتے ہوئے کہا ہے کہ موجودہ صورتحال میں قومی اسمبلی کا ایوان 328 سے 330 کا ہے جس میں سے 168 اراکین کی حمایت پی ٹی آئی کو مل گئی ہے جس میں خواتین اور اقلیتی اراکین بھی شامل ہیں۔

(جاری ہے)

انہوں نے کہا کہ پنجاب اسمبلی میں بھی تحریک انصاف کو مطلوبہ نمبرز حاصل ہوگئے ہیں۔

انہوں نے کہا کہ پنجاب اسمبلی کا ہاؤس 371 کا ہے لیکن اس وقت کی صورت حاصل میں یہ ایوان 360 کے لگ بھگ رہ جائیگا۔ انہوں نے کہا کہ پنجاب میں ہماری 180 نشستیں ہوگئی ہیں۔انہوں نے کہا کہ وفاق اور پنجاب میں حکومت ہم بنائیں گے، بلوچستان میں مخلوط حکومت بنائی جائے گی جبکہ خیبرپختونخوا میں ان کی پارٹی کے پاس دو تہائی اکثریت موجود ہے۔ترجمان پی ٹی آئی نے کہا کہ مسلم لیگ (ق) سے فارمولا طے پایا ہے، وہ پنجاب اور مرکز دونوں میں شراکت دار ہوگی تاہم وزیراعلیٰ پنجاب تحریک انصاف سے ہی ہوگا جس کا فیصلہ عمران خان کریں گے۔

انہوں نے کہا کہ وفاقی کابینہ میں اتحادیوں کو نمائندگی دی جائے گی جس کا فیصلہ عمران خان کریں گے۔انہوں نے کہا کہ چودھری پرویز الٰہی اور چودھری شجاعت حسین سے پی ٹی آئی رہنماؤں کی ملاقات ہوئی ہے انہوں نے بھی حمایت کی یقین دہانی کروادی ہے۔انہوں نے کہا کہ متحدہ قومی موومنٹ (ایم کیو ایم) پاکستان سے پارٹی رہنما جہانگیر ترین جلد ملاقات کریں گے۔انہوں نے کہا کہ آج کے دن میں 10 ارکان پنجاب اسمبلی اور قومی اسمبلی کے 2ارکان نے پی ٹی آئی میں شمولیت کا اعلان کیا ہے ،و فاق اور پنجاب میں ہماری اکثریت کو کوئی چیلنج نہیں کرسکے گا۔انہوں نے کہا کہ جی ڈے اور بی این پی بھی ہمارے اتحادی ہوں گے۔