وفاق سمیت پنجاب اور خیبرپختونخوا میں بآسانی حکومت بنا لیں گے،وزیراعلیٰ پنجاب کا حتمی فیصلہ عمران خان ہی کریں گے،

تحریک انصاف کے رہنما چوہدری محمد سرور کی نجی ٹی وی چینل سے گفتگو

پیر 30 جولائی 2018 00:10

اسلام آباد ۔ (اُردو پوائنٹ اخبار آن لائن۔ پیر 30 جولائی 2018ء) پاکستان تحریک انصاف کے رہنما چوہدری محمد سرور نے کہا ہے کہ ہم وفاق سمیت پنجاب اور خیبرپختونخوا میں بآسانی حکومت بنا لیں گے، پنجاب کے وزیراعلیٰ کے لیے پنجاب کے عوام اور پارٹی سے مشاورت جاری ہے حتمی فیصلہ عمران خان ہی کریں گے۔ ان خیالات کا اظہار انہوں نے جمعہ کو ایک نجی ٹی وی چینل سے گفتگو کرتے ہوئے کیا۔

انہوں نے کہا کہ منتخب ہونے والے تمام آزاد امیدوار پی ٹی آئی میں آنا چاہتے ہیں ان میں سے کوئی بھی (ن) لیگ کو جوائن نہیں کرے گا، آزاد امیدواروں کے ووٹرز کا بھی یہی مطالبہ ہے کہ وہ پی ٹی آئی جوائن کریں۔ انہوں نے کہا کہ (ق) لیگ سے ہم نے سیٹ ایڈجسٹمنٹ کی تھی اسلیے اخلاقی طور پر یہ سیٹیں ہماری ہیں، (ق) لیگ کے لوگ ایسے نہیں کہ وہ ہم سے وزارت اعلیٰ کی سیٹ مانگیں البتہ یہ ممکن ہے کہ (ق) لیگ کے لوگ پنجاب میں ہم سے کچھ وزارتیں مانگیں۔

(جاری ہے)

انہوں نے مزید کہا کہ ہم پنجاب میں حکومت بنانے کی مضبوط پوزیشن میں ہیں کیونکہ پاکستان مسلم لیگ (ن)، پاکستان پیپلز پارٹی اور ایم ایم اے کے ارکان مل بھی جائیں تو بھی پنجاب میں پی ٹی آئی کی سیٹیں زیادہ ہیں۔ ایک سوال کے جواب میں انہوں نے کہا کہ 25 جولائی کو ملک میں ہونے والے عام انتخابات پاکستان کی تاریخ کے شفاف ترین انتخابات تھے، کسی ایک جگہ پر بھی دھاندلی کے کوئی ثبوت نہیں دئیے گئے، انتخابات بالکل شفاف ہوئے ہیں،کسی بھی ووٹر نے دھاندلی کی شکایت نہیں کی۔

انہوں نے کہا کہ الیکشن 2018ء میں سب کو ووٹ دینے کی مکمل آزادی تھی اور نہ ہی کہیں سے ٹھپے لگانے کی کوئی شکایت موصول ہوئی۔ ایک اور سوال کے جواب میں انہوں نے کہا کہ وزیراعلیٰ پنجاب کا حتمی فیصلہ عمران خان ہی کریں گے۔