Baat Tu Aik Hi Hai, Urdu Nazam By Abrar Ahmad

آہستہ چلیں یا تیز

ایک بار ہی آنسو بہا دیں

یا انھیں اپنے اندر جمع رکھیں

ڈھیروں باتیں کریں یا چپ کی دھول میں لپٹے رہیں

اجلے لباس پہنیں یا موسموں کی چادر اوڑھے رہیں

خاک کی طرح بیٹھ رہیں

یا اونچی ہواؤں میں اڑتے پھریں

دیوار کے ساتھ لگے رہیں یا در در کی ٹھوکریں کھائیں

بات تو ایک ہی ہے

بارشوں میں نہائیں، یا دھوپ میں سوکھتے پھریں

میٹھی نیند سویئں

یا عمر بھر کا رتجگا منائیں

اسے دیکھیں

یا اس سے بے نیاز ہو جائیں

محبت کریں یا ایک فضول نفرت کے ہمراہ

زندگی سے گزریں

بات تو ایک ہی ہے

رومان بھری اداسی یا پر تشدد اکتاہٹ

خود فریبی کے پھول یا سچائی کی ضربیں

بچپن کے جھولے ، یا پختہ عمر کے جھٹکے

آہستہ خرام سفر ،یا راستوں کو ادھیڑتے ہوے سموں کا شور ........

.......................

اضمحلال اور اندھیرا گرنے کی رفتار تو ایک سی رہتی ہے

جہاں بلآخر ہمیں پہنچنا ہے

ہم نہ بھی چاہیں

تو ایک دن پہنچا دیے جائیں گے