Aik Or Iftikhar K Naam, Urdu Nazam By Iftikhar Bukhari

تم تو کہتے تھے

دنیا بدلنے کو ہے

چھوٹے چھوٹے تھے ہم

فلسفی کہہ کے سب چھیڑتے تھے تمہیں

فلاں نے کہا ہے!

فلاں نے لکھا ہے!

کتابوں سے دیتے تھے اکثر حوالے

سویرے سویرے

مجھے روز لے جاتے تھے

ساتھ اسٹال پر

مفت اخبار پڑھنے

یہ دُھن تھی

کہ بس ہو نہ ہو

آج دنیا بدلنے کی اچّھی خبر

چَھپ گئی ہو

زمانے کی آندھی میں اُڑتے ہوئے

ٹکڑے اخبار کے

ہم جدا ہو گئے

پھر ملے ہی نہیں

افتخار!

اب مرے شیشہء عمر میں

آخری ریت ہے

چند آئندہ اخبار باقی ہیں شاید

ترے نقش دھندلا چکے ہیں

مری یاد میں

پر ترا نام میں بھول سکتا نہیں

میرے بچپن کے اے دوست

ہم دونوں ہم نام تھے نا !

نہیں جانتا

تم کہاں ہو

یا شاید نہیں ہو ابھی تک

مری طرح دنیا میں

دنیا جو بدلی نہیں

ہاں !

جو اسٹال تھا، نا

وہ اخبار کا

ریلوے روڈ پر

اُس جگہ ایک جوتوں کی دکان ہے

اُس زمانے کے ہاکر سبھی مر چکے ہیں