Koi Pehchaan Nahi Chekhoon Ki, Urdu Nazam By Jameel Ur Rahman

جس طرح لہر پہ اک لہر جمے

جیسے تصویر پہ تصویر بنے

جس طرح خواب پہ اک خواب گرے

اور آنکھوں میں فقط دھول اڑے

کتنی دھندلائی ہوئی دنیا ہے

دور تک بہتا ہوا پانی بہت گدلا ہے

کشتیاں تیز ہواؤں میں اڑی جاتی ہیں

ان سنی موت کی خوشبو میں گھرے ساحل پر

پیڑ سنسان ہیں

پنگھٹ پہ ہیولے رقصاں

کیسا موسم ہے کہ پتے نہ پرندے نہ کوئی شاخِ ثمر

صرف وہ اژدھے جو مور نگل جاتے ہیں

روشنی پیتے ہیں اور تیرگی پھیلاتے ہیں

کینوس سر بگریباں کہ نہیں رنگ دگر

ہر طرف ٹوٹ کے بکھری ہوئی آوازوں میں

روح حیراں ہے کہ پھر اصل کہاں ہے ان کی

کوئی پہچان نہیں چیخوں کی

کوئی زنجیر کہ جس میں ان کو

باندھ سکتا ہو کوئی

ایسی تاثیر کہ جو عرش ہلا سکتی ہو

کوئی تصویر کہ چہرہ تو دکھا سکتی ہو

لمحہ در لمحہ مگرایک ہی ساکت منظر

جس طرح لہر پہ ہر لہر جمے

جیسے تصویر پہ تصویر بنے

جس طرح خواب پہ اک خواب گرے

کچھ عیاں ہو نہ بیاں

صرف آنکھوں میں کہیں دھول اڑے!