Ohood Faramoshoon Ka Alif Laila, Urdu Nazam By Jameel Ur Rahman

شکاریوں کا جشن جاری ہے

میرے چاروں طرف

اُن مذبوح پرندوں اور مچھلیوں کے ڈھیر لگے ہیں

جن کے مردہ اجسام پر

ہوا اور پانی کے رشتے توڑ کر بکھیر دیے گئے

سبھی نے ہوا اور پانی سے

ایک عہد کیا تھا

مگر کسی نے

اُس کی پاس داری نہ کی

کوئی نہ کوئی

ایک جشن مناتا رہا

کہ ہم سب شکاری تھے

جنگلوں میں الاؤ دہکتے رہے

اور گھروں میں وقت

محرومیوں کی ہتھیلیوں کی

موت اور فاقوں سے حنا بندی کرتا رہا

زندگی کی گلیوں پر طاری حبس

کون دیکھتا

ہوا عہد فراموشوں سے ناراض تھی

اور پانی اُن پر ماتم کناں

میں نے دیکھا

کہ وہ چراغ کی لو میں

روشنی کے ساتھ رقص زن

اندھیرے اور دھوئیں سے غافل ہیں

اور نیم تاریک دیواروں سے باتیں کرتے

سیاہ کواڑوں پر ہوتی دستک کے قدموں میں اپنے ہونٹ بچھاتے

ایسی دہشت میں لپٹی عمر کے سائے میں سانس لے رہے ہیں

جس سے نجات پانے کے لیے

ہر عہد توڑ کر

وہ مچھلیوں اور پرندوں کا شکار کرتے ہیں

میں

اُن کے ہر جشن کا گواہ

لمحہ بہ لمحہ

ان چاہی مگر یقینی موت کے قدموں کی دھمک سنتا

اندر ہی اندر لرزتا

اُن میں ہونے کے باوجود

صرف یہ سوچ کر

روز ایک نظم لکھتا رہا

کہ شاید وہ بہانہ بن جائے

میری زندگی میں

ایک اور دن کے اضافے کا