Aik Aurat Ka Aitraaf, Urdu Nazam By Nusrat Zehra

گئے دنوں میں،میں کتنا خوش رہتی تھی

دن بھر مجھ میں خواب چہکتے

اور راتوں کو میں

تھک کر ایسے سو جاتی

جیسے چڑیا دانہ چگتے چگتے

اپنے ننھے گھونسلے میں

پر سمیٹے سوتی ہے

مجھ میں برکھا ناچتی تھی

میں تاروں کو گنتی تھی

سرخ،سُنہری،رنگ رنگیلے

ریشمیں،آتشی،سبز اور اُودے

میرے ابرق لگے دوپٹے

سُکھ کی آشاؤں میں بھیگتے رہتے تھے

میں اپنے سارے سپنوں کو

دن بھر خط لکھتی رہتی تھی

اب میں خود سے باتیں کرتی

شام ڈھلے دن بھر کے اُدھڑے

خوابوں میں پیوند لگاتی

اور صبح پھر

خدشوں کے اندھے غاروں میں

ہاتھ ٹٹولتی رہتی ہوں

کہیں مری اُجڑی ہوئی ہستی

کہیں مرا پھیلا ہوا دامن

اپنے آپ میں کُڑھتے،کُڑھتے

دن بھر

جیتے مرتے رہتے ہیں

مالک کیا کبھی

ایسا بھی کوئی معجزہ ہو گا

میرے اُدھڑے

پھٹے پرانے

جیون کو

مٹی کی خوشبو سے سوندھا

آگ کی مانند جلنے والا

جھرنے جیسا بہنے والا

ایسا ان مٹ رنگ لگا دے

میرے تن کی نیلاہٹ کو

سونے جیسا روپ چڑھا دے

مجھ میں کوئی جوت جگا دے